१६ चैत्र २०८०, शुक्रबार | Fri Mar 29 2024

लाल भागिरथा प्रतिष्ठानद्वारा तीन प्रतिभालाई पुरस्कार दिने निर्णय




मेचीनगर- झापाको लाल भागिरथा बानियाँ प्रतिष्ठानले यसवर्ष चिकित्सा, कृषि र गृहिणी क्षेत्रमा विशिष्ट योगदान पुर्याउनु भएका झापाका तीन जना प्रतिभालाई पुरस्कार दिने निर्णय गरेको छ ।

प्रतिष्ठानले त्रिभुवन विश्वविद्यालय शिक्षण अस्पतालका सहप्राध्यापक एवम् प्रसिद्ध न्यूरो सर्जन डा. गोपाल सेडाई, मेचीनगर–३ बाहुनडाँगीका व्यावसायिक कृषक प्रधान किसान र मेचीनगर–७ गोमनसरीकी गृहिणी ज्ञानु खड्कालाई पुरस्कृत गर्ने भएको हो ।

प्रतिष्ठानको आज बसेको प्रतिभा छनौट समितिको बैठकले उहाँहरुलाई पुरस्कार दिने निर्णय गरेको प्रतिष्ठानका अध्यक्ष एवम् छनौट उपसमितिका संयोजक हरिचरण बानियाँले जानकारी दिनुभयो ।

दुई वर्ष अघि शिक्षासेवी हरिचरण बानियाँ र उहाँको दाजुभाईहरुको संयुक्त पहलमा स्वर्गवासी मातापिताको स्मृतिमा लाल भागिरथा बानियाँ प्रतिष्ठान स्थापना गरिएको थियो । संस्थाले समाजमा विशिष्ट योगदान पुर्याउनु भएका प्रतिभाहरुलाई प्रोत्साहित गर्ने उद्देश्यले रु. १० लाखको सुरुवाती अक्षय कोष खडा गरेको छ ।

कोषको व्याज रकमबाट हरेक वर्ष तीन जना प्रतिभालाई जनही रु. ३१ हजार नगद पुरस्कार र सम्मानपत्रसहितको उत्कृष्ट पुरस्कार दिने गरिएको छ ।

उत्कृष्ट प्रतिभा पुरस्कार डा. सेडाईलाई
यसवर्षको उत्कृष्ट प्रतिभा पुरस्कार डा. गोपाल सेडाईलाई प्रदान गरिने भएको हो । डा. सेडाई झापाको मेचीनगर नगरपालिका वडा नं. ११ निवासी प्रसिद्ध न्यूरोसर्जन चिकित्सक हुनुहुन्छ । उहाँले हेमोफिलिया भएका बिरामीको मस्तिष्कघातको नेपालमै पहिलोपटक सफल शल्यक्रिया गर्नुभएको थियो । उहाँले भारतको नयाँ दिल्लीस्थित एम्सबाट एमएस एमसीएच डिग्री हासिल गर्नुभएको हो ।

उहाँ हाल त्रिभुवन विश्वविद्यालयको शिक्षण अस्पतालमा सहप्राध्यापक हुनुहुन्छ भने ग्रान्डी इन्टरनेसनल हस्पिटल लगायतका अस्पतालमा समेत उपचार सेवा प्रदान गर्नुहुन्छ । आइएस्सी अध्ययनका क्रममा उहाँले सिद्धार्थ बनस्थलीबाट नेपाल प्रथम स्थान हासिल गर्नुभएको थियो । उहाँका ६० भन्दा बढी शोधहरु अमेरिका, चीन, कोरिया, जापान लगायतका मुलुकका जर्नलमा प्रकाशित भइसकेका छन् ।

उत्कृष्ट कृषि पुरस्कार प्रधान किसानलाई
यसवर्षको उत्कृष्ट कृषि पुरस्कार मेचीनगर–३ बाहुनडाँगीको दोकानडाँडा निवासी ५६ वर्षीय प्रधान किसानलाई प्रदान गरिने भएको छ ।
उहाँ नेपालकै लोपोन्मूख एवम् झापामा मात्र पाइने किसान समुदायका अगुवा हुनुहुन्छ । नेपालमा आदिबासी वर्गमा पर्ने किसान समुदायको जनसंख्या पाँच सयको हाराहारीमा रहेको मानिएको छ ।

उहाँ किसान समुदायमा छोराछोरीलाई शिक्षादीक्षा दिनुपर्छ र परम्परागत निर्वाहमुखी कृषिलाई व्यावसायिक बनाएर आर्थिक उन्नतिको खुड्किलो उक्लिनुपर्छ भन्ने मान्यता राख्नुहुन्छ । उहाँकी जेठी छोरी रेणुका किसान आफ्नो समुदायमा एसएलसी उत्तीर्ण गर्ने प्रथम महिला हुनुहुन्छ । अधियाँ र ठेक्का जग्गा कमाउँदै व्यावसायिक एवम् अग्ग्र्यानिक तरकारी खेतीबाट आर्थिक समृद्धि हासिल गर्नुभएको उहाँको संघर्षशील एवम् उदाहरणीय कर्मलाई पुरस्कृत गरिएको हो ।

उत्कृष्ट गृहिणी पुरस्कार ज्ञानु खड्कालाई
मेचीनगर–७ मा ८६ वर्षीया सासु रत्नमाया र ९४ वर्षीय ससुरा मानबहादुर खड्काको स्याहार र पारिवारिक व्यवस्थापनमा असल बुहारीको रुपमा पुर्याएको योगदानको कदर गर्दै उहाँहरुकी ३७ वर्षीया बुहारी ज्ञानु खड्कालाई यसवर्षको उत्कृष्ट गृहिणी पुरस्कार प्रदान गर्ने निर्णय भएको हो ।
बुहारी ज्ञानु खड्काले बुढ्यौली र अनेक रोगले थलिएकी सासु र प्रोस्टेटको शल्यक्रियापश्चात पिसाबको थैली शरीर बाहिर बोकेर हिँड्नु पर्ने अवस्थाका ससुराको नियमित स्वास्थ्य हेरचाह र पालनपोषणमा कुनै गुनासो आउन नदिई सेवा गरिरहनु भएको छ ।
…………

प्रकाशित मिति : १७ मंसिर २०७८, शुक्रबार ००:००  ८ : ४५ बजे