काठमाडौँ– चितवन निर्वाचन क्षेत्र नम्बर-२ मा आगामी बैशाख १० गते उपनिर्वाचन हुने भएको छ । निर्वाचन आयोगले आइतबार चितवन-२ मा २०८० वैशाख १० गते उपनिर्वाचनको मिति तोकेको हो ।
रिक्त रहेको प्रतिनिधि सभा सदस्यको उपनिर्वाचन गर्ने गरी निर्वाचनको मिति तोकिएको आयोगका प्रवक्ता शालिग्राम शर्मा पौडेलले बताए ।
चितवन २ बाट निर्वाचित राष्ट्रिय स्वतन्त्र पार्टीका रवि लामिछानेलाई नागरिकता विवादमा सर्वोच्च अदालतले दोषी ठहर गरेपछि उनको सांसद पद गुमेको छ ।
उप निर्वाचन घोषाणपछि फागुन १ गतेदेखि २०७९ चैत १६ गतेसम्म उक्त क्षेत्रमा मतदाता नामावली अद्यावधिक कार्यक्रम सञ्चालन हुने आयोगले जनाएको छ ।
आयोगले उम्मेदवारको मनोनयन दर्ता २०७९ चैत २० गते तोकेको छ । उम्मेदवारको अन्तिम नामावली प्रकाशन गरी उम्मेदवारलाई निर्वाचन चिन्ह प्रदान गर्ने कार्य चैत २३ गते हुनेछ ।
गत आइतबार राजधानीमा आयोजित पत्रकार सम्मेलनमा लामिछानेले आफू फेरि चितवन–२ मा उम्मेदवार हुने घोषणा गरिसकेका छन् । तर, उनी उम्मेदवार हुन पाउँछन् कि पाउँदैनन् त ?
कतिपयले यसलाई जोडतोडले उठाइरहेका भए पनि उनले नेपाली नागरिकताको प्रमाणपत्र लिइसकेका छन् । त्यसैकारण उनी फेरि उम्मेदवार बन्न पाउनेमा कुनै दुई मत छैन् ।
झुटा विवरण लिई राहदानी लिएको आरोपमा लामिछानेमाथि प्रहरीले अनुसन्धान सुरु गरे पनि यसले अन्तिम टुंगो नपाएसम्म उनलाई उम्मेदवार बन्न कुनै समस्या हुने छैन् ।
प्रतिनिधिसभा सदस्य निर्वाचन ऐन, २०७४ को दफा १३ मा भएको उम्मेद्वारको अयोग्यता सम्बन्धी व्यवस्थाले पनि उनलाई उम्मेदवार हुन छेक्दैन् । अदालतबाट दोषी ठहर भई त्यो फैसला अन्तिम भएमा भने उम्मेद्वार हुन नपाउने व्यवस्था ऐनमा छ ।
