बिर्तामोड– पूर्वेली ढुवानी सेवा लगायतका ढुवानी व्यवसायीले जिल्ला ट्राफिक प्रहरी कार्यालय झापाका प्रमुख प्रहरी निरीक्षक नवराज न्यौपानेलाई बिदाई गरेका छन् । पूर्वेली ढुवानी सेवाको कार्यालयमा सोमबार बिहान आयोजित कार्यक्रमकाबीच प्रहरी निरीक्षक न्यौपानेलाई बिदाई गरिएको हो ।
पूर्वेली ढुवानी सेवाका सञ्चालक निर्मल खत्री, हाम्रो ढुवानी सेवाका सञ्चालक पदम श्रेष्ठ, कोहिनुर ढुवानी सेवाका सञ्चालक हिमेश अधिकारी, पूर्वाञ्चल बेकरीका सञ्चालक प्रल्लाद अधिकारी लगायतले प्रहरी निरीक्षक न्यौपानेलाई खादा, माला, सम्मानपत्र र मायाको चिनोसहित बिदाई गरेका छन् ।
एक वर्ष अघि झापा प्रहरीको ट्राफिक कमाण्ड सम्हालेका प्रहरी निरीक्षक न्यौपानेको नेपाल प्रहरी विपत् व्यवस्थापन कार्यालय तालिम शाखा सामाखुसी सरुवा भएको छ । सरुवा भएर तोकिएको जिम्मेवारीमा जानु पूर्व उनलाई बिदाई गरिएको हो ।
प्रहरी निरीक्षक न्यौपाने सरुवा भइरहँदा झापाको ट्राफिक व्यवस्थापनको कमाण्ड सम्हाल्न प्रहरी निरीक्षक गणेश पौडेल आइपुगेका छन् । न्यौपानेको बिदाईसँगै पौडेललाई पनि स्वागत गरिएको छ ।
बिदाई मन्तव्य राख्दै प्रहरी निरीक्षक न्यौपानेले अनेक चुनौति र आरोह अवरोहका बीच आफूले झापाको ट्राफिक व्यवस्थापनमा सुधार ल्याउने प्रयत्न गरेको बताए । उनले झापा आएर काम गर्दा आफूले थुप्रै साथी संगत कमाएको बताउँदै त्यसलाई एउटा सम्पत्तिका रुपमा ग्रहण गर्ने उल्लेख गरे ।
झापाका अग्रज पत्रकार सुब्रत न्यौपानेले सरुवा बढुवालाई नियमित प्रक्रियाका रूपमा लिनुपर्ने बताउँदै कार्यस्थलमा आपसमा गाँसिएका सम्बन्धहरू सधैं दरिलो हुनुपर्नेमा जाेड दिए ।
सहरीकरणको चपेटामा परेको बिर्तामोड सहर र त्यस वरपरको ट्राफिक व्यवस्थापन चुनौतिपूर्ण बन्दै गएको भन्दै पत्रकार न्यौपानेले आवश्यक कार्य योजना बनाएर ट्राफिकको नयाँ नेतृत्व अगाडि सर्नुपर्ने बताए ।
हाम्रो ढुवानी सेवाका सञ्चालक पदम श्रेष्ठ झापाको ट्राफिक व्यवस्थापनलाई सुधार गर्ने रणनीतिसहित प्रहरी निरीक्षक न्यौपानेले चालेका कदम सकारात्मक र प्रभावकारी भएको बताउँछन् ।
‘उहाँले आफ्नो व्यवसायिक सीप र दक्षता देखाएर आपसी समन्वय र सम्पर्कका आधारमा झापाको ट्राफिक व्यवस्थापनमा रचनात्मक र प्रभावकारी भूमिका निर्वाह गर्नुभएको छ’, सञ्चालक श्रेष्ठले भने, ‘आगामी दिनमा नयाँ चुनौतिहरूलाई चिर्दै आफूलाई अब्बल साबित गर्ने दायित्व नयाँ इन्सपेक्टर सावकाे काँधमा आएको छ ।’
पूर्वेली ढुवानी सेवाका सञ्चालक खत्रीले व्यवसायीलाई परेका पीरमर्कामा ट्राफिक प्रहरीले सधैँ समन्वयकारी भूमिका निर्वाह गर्दै आएको बताउँछन् । ट्राफिक व्यवस्थापनमा देखिएका चुनौतिहरूलाई साझा समस्याका रूपमा बुझ्नुपर्ने बताउँदै खत्रीले आपसी सहकार्यले मात्रै समाधान निस्किने बताए ।
