धुलाबारी– झापाको मेचीनगर-९ गैरीगाउँका एक युवक लागूऔषध ब्राउन सुगरसहित पक्राउ परेका छन् ।
इलाका प्रहरी कार्यालय धुलाबारीबाट खटिएको प्रहरी टोलीले शनिबार साँझ सालु भनिने अजय राजवंशीलाई पक्राउ गरेको हो ।
लागू औषधको किनबेच हुँदै गरेको सूचनाका आधारमा प्रहरी निरीक्षक पाण्डवलाल राजवंशीको नेतृत्वमा प्रहरी टोली परिचालित भएको थियो ।
२८ वर्षीय राजवंशीको घरमा पुगेर खानतलासी गर्दा साइकलको ह्यान्डलभित्र लुकाएर राखिएको अवस्थामा पाँच ग्राम ९० मिलिग्राम लागूऔषध ब्राउन सुगर भेटिएको हाे ।
जिल्ला प्रहरी कार्यालय झापाका अनुसार प्रहरीले घटनास्थलबाट पाँच थान मोबाइल र नगद ५० हजार समेत बरामद गरेको छ ।
