झापा-जापानिज इन्सेफ्लाइटिसको प्रकोप बढ्दै जाँदा ज्यान गुमाउनेको सङ्ख्या थपिँदै गएको छ । देशभर ३० वटा जिल्लामा प्रकोप फैलिएको स्वास्थ्य मन्त्रालयको परिवार कल्याण महाशाखाले जनाएको छ ।
इन्सेफ्लाइटिस संक्रमणले १५ जिल्लामा २३ जनाको मृत्यु भएको छ । देशभर ८० जना संक्रमित फेला परेका छन् । संक्रमित हुनेमा अधिकांश १५ वर्ष मुनिका बालबालिका छन् ।
खोप शाखाका प्रमुख डाक्टर अभियान गौतमका अनुसार सबैभन्दा बढी कैलाली जिल्ला प्रभावित छ । त्यहाँ तीनजनाले ज्यान गुमाएका छन् । सुनसरी र झापामा दुई-दुई जनाको मृत्यु भएको छ ।
डाक्टर गौतमका अनुसार नेपालमा जापानिज इन्सेफ्लाइटिसको मृत्युदर बढेर २८ प्रतिशत पुगेको छ । खोप अभियानमार्फत रोग नियन्त्रणमा रहेको बताइए पनि पछिल्लो समय मृत्युदर बढ्दै गएपछि विज्ञले चिन्ता व्यक्त गरेका छन् ।
सन् २०२३ मा नेपालमा १०७ जनामा संक्रमण पुष्टि हुँदा ७ जनाको मृत्यु भएको थियो । सन् २०२४ मा मानवीय क्षतिको संख्या बढेको छ ।
