काँकडभिट्टा– झापाको काँकडभिट्टा नाकाबाट तीन थान एयर गन (बन्दुक) सहित चारजना भारतीय नागरिकलाई प्रहरीले नियन्त्रणमा लिएको छ ।
पक्राउ पर्नेमा भारत पश्चिम बङ्गालकाे दार्जिलिङ जिल्ला बस्ने २० वर्षीय ओम साह, सोही ठाउँका २५ वर्षीय सिद्धार्थ मगर, २० वर्षीय मोहम्मद सुलतान हुसेन र २० वर्षीय बिट्टुु सरकार छन् ।
उनीहरूलाई एयर गनसहित नियन्त्रणमा लिइएको जिल्ला प्रहरी कार्यालय झापाका डीएसपी बसन्त पाठकले जानकारी दिए ।
मेचीनगर नगरपालिका–६ स्थित भन्सार गेट अगाडि इलाका प्रहरी कार्यालय र सशस्त्र प्रहरी बल नेपाल बोर्डर आउट पोस्ट काँकडभिट्टाको संयुक्त प्रहरीले टोलीले उनीहरूलाई नियन्त्रणमा लिएको हो ।
भारतबाट नेपालतर्फ आइरहेका उनीहरूलाई सीमा नाकामा तैनाथ सुरक्षाकर्मीले चेकजाँच गर्दा फलाम र काठले बनाएको टमी कम्पनी उल्लेख तीन वटा एयर फेला पारेको थियो ।
नियन्त्रणमा लिएका चारै जनालाई इलाका प्रहरी कार्यालय काँकडभिट्टामा राखेर थप अनुसन्धान अघि बढाएको डीएसपी पाठकले बताए ।
