झापा– नेपाल महिला सङ्घ झापाले झापाका पाँचवटै निर्वाचन क्षेत्रमा क्षेत्र स्तरीय प्रशिक्षण कार्यक्रम आयोजना गर्ने निर्णय गरेको छ । सङ्घको बैठकले भदौ २ गतेदेखि ७ गतेसम्म प्रशिक्षण आयोजना गर्ने निर्णय गरेको हो ।
महिलाको नेतृत्व विकास, महिला अधिकार सम्बन्धी कानुनी व्यवस्था, प्रजातान्त्रिक आन्दोलनको इतिहास र महिला सङ्घ लगायतका विषयमा प्रशिक्षण दिइने नेपाल महिला सङ्घ झापाकी अध्यक्ष टीकादेवी सिटौलाले बताइन् ।
नेपाली कांग्रेस झापाका कार्यवाहक सभापति केशवराज पाण्डेको प्रमुख आतिथ्यमा बैठक सम्पन्न भएको हो । सचिव उर्मिला ढकालका अनुसार प्रशिक्षणमा वडा, गाउँ, नगर र क्षेत्रका पदाधिकारी एवम् सदस्यको सहभागिता रहनेछ ।
बैठकले आगामी साउन २४ गते महिला सङ्घको ७७ औँ स्थापना दिवस रचनात्मक कार्यक्रम आयोजना गरी मनाउने निर्णय गरेको सचिव ढकालले बताइन् ।
बैठकमा सहभागी गाउँ, नगर र क्षेत्रीय सभापतिहरूलाई संघकी संस्थापक अध्यक्ष मंगलादेवी सिंहको फोटो उपहार स्वरूप प्रदान गरिएको छ ।
