उर्लाबारी-मोरङको उर्लाबारीस्थित मंगलबारेमा बिहीबार साँझ भएको दुर्घटनामा घाइते भएका थप एक जनाको मृत्यु भएको छ । दुईवटा मोटरसाइकल आपसमा ठोकिँदा दुर्घटना भएको थियो ।
दुर्घटनामा मोरङको बेलबारी घर भएका २६ वर्षीय अमित लिम्बुको मृत्यु भएको जिल्ला प्रहरी कार्यालय मोरङले जनाएको छ । उनको बिर्तामोडस्थित बीएण्डसी अस्पतालमा मृत्यु भएको मोरङका डीएसपी वेद जोशीले बताए ।
दुर्घटना लगत्तै मोरङको पथरी शनिश्चरे नगरपालिका–५ का ३३ वर्षीय दीपक धिमाल र मोरङको कानेपोखरी गाउँपालिका–४ धम्कुवाका २८ वर्षीय किशोर गुरुङले ज्यान गुमाएका थिए ।
प्रहरीका अनुसार पूर्वतर्फ जाँदै गरेको प्रदेश १(०२(०५० प ८४०६ र पश्चिमतर्फ आउँदै गरेको प्रदेश १-०२-०४३ प ९२२६ नम्बरको मोटरसाइकल आपसमा ठोक्किएका हुन् । घाइते पथरी ५ का ३८ वर्षीय विष्णु धिमालको चिन्ताजनक अवस्थामा उपचार भइरहेको छ ।
