बिर्तामोड-अलग–अलग मुद्दाका पाँच जना फरार अपराधीलाई झापा प्रहरीले पक्राउ गरेको छ । फैसला कार्यान्वयनको लागि खटिएको प्रहरी टोलीले डाँका मुद्दाका दुईसहित उनीहरुलाई पक्राउ गरेको हो ।
पक्राउ पर्नेमा कचनकवल गाउँपालिका–३ का शेरबहादुर तामाङ, बिर्तामोड–४ का मानस, बिर्तामोड–३ का संसार, कनकाई–७ का सुरज चौधरी र मेचीनगर–१० का जीवनकुमार लामा छन् ।
प्रहरीका अनुसार तामाङ वन्यजन्तु चोरी मुद्दाका अपराधी हुन् । उनलाई झापा जिल्ला अदालतले ६ महिना कैद र १० हजार जरिवानाको फैसला सुनाएको थियो ।
सांकेतिक नाम मानस भएका अर्का अभियुक्त डकैतीमा संलग्न भएको प्रहरीले जनाएको छ । घटना हुँदा नावालक रहेका उनको बास्तविक नाम अदालतले नखुलाएकाले प्रहरीले सांकेतिक नाम प्रयोग गरेको हो ।
डाँका मुद्दाका अर्का अभियुक्त संसार हुन् । उनको नाम पनि सांकेतिक हो । उनलाई अदालतले एक वर्ष कैद र २० हजार रुपैयाँ जरिवाना फैसला सुनाएको थियो ।
चौधरी मोटरसाइकल चोरी मुद्दाका अपराधी हुन् । सात वर्षदेखि फरार रहेका चौधरीलाई अदालतले एक महिना १५ दिन कैद र तीनलाख १४ हजार आठ सय ५० रुपैयाँ जरिवाना तोकेको थियो ।
लामा सवारी सवारी ज्यान मुद्दाका अभियुक्त हुन् । उनलाई एक महिना कैद र दुई हजार रुपैयाँ जरिवाना तोकिएको छ । पक्राउ परेका सबै अपराधीलाई कैद सजाय भुक्तानका लागि कारागार चलान गरिएको झापा प्रहरीका प्रवक्ता डीएसपी खगेन्द्रप्रसाद रिजालले बताए ।
