बिर्तामोड-शनिश्चरे दानावारी सडक खण्ड आइतवारदेखि अवरुद्ध भएको छ । विरीङ खोलाको पुल भासिएपछि उक्त सडकमा सवारी आवागमन बन्द भएको हो ।
शनिवार रातिदेखि परेको पानीका कारण विरीङमा आएको बाढीले पुल भासिएको स्थानीयले बताएका छन् । २०६५ सालमा भारतीय दूतावासको सहयोगमा निर्माण भएको पुल जीर्ण भइसकेको छ ।
अर्जुनधारा नगरपालिकाले समयमा ध्यान नदिँदा पुल मर्मत नभएको स्थानीय सेवन्त ढकाल बताउँछन् । पुल भासिएपछि शनिश्चरे दानावारी सडक सञ्जालको सम्पर्क टुटेको छ । यद्यपि, दुई बैकल्पिक मार्गबाट भने आवतजावत गर्न सकिन्छ ।
पुल भासिनु अघि स्थानीयले दुवैतर्फ आवागमन ठप्प पारेका थिए । पुल भासिँदा पूर्वपट्टिको जग धरापमा परेको छ भने पुलको माथिल्लो भाग खोलाको सतहमा पुगेको स्थानीय जितेश योञ्जनले बताए ।
