उदयपुर-सखुवाका १४ हजार हरिया रुख काटेर उदयपुरमा सगरमाथा विमानस्थल बनाइने भएको छ । उदयपुरको त्रियुगा नगरपालिकामा विमानस्थल बनाउने प्रारम्भिक तयारी थालिएको हो ।
विमानस्थल निर्माणका लागि विभिन्न सामुदायिक वन क्षेत्रका करिव १४ हजार सखुवाका रुख काटिएका छन् । काटिएका रुख बिक्रीका लागि सामुदायिक वन समूहले धमाधम काम गरिरहेका छन् ।
मोतियाही सामुदायिक वन उपभोक्ता समितिका अध्यक्ष रामश्रीष्ठ चौधरीले विमानस्थल बनाउने सपना पूरा गर्ने गरी रुख काटिएको र अहिले काठ दाउरा बेचिरहेको बताए ।
२०७८ माघ २४ गते वन तथा भू संरक्षण विभाग र नेपाल नागरिक उड्डयन प्राधिकरण बीच सगरमाथा विमानस्थल निर्माण गर्न वन क्षेत्रको जग्गा प्रयोग गर्न दिने सम्झौतामा हस्ताक्षर भएको थियो ।
