पशुपतिनगर-प्रलोभनमा पारेर भारत लैजाँदै गरेको अवस्थामा इलामको पशुपतिनगरबाट पाँच जना महिलाको उद्धार गरिएको छ । बेचबिखनका लागि लैजाँदै गरेको सूचनाका आधारमा प्रहरीले उनीहरुको उद्धार गरेको हो ।
माइती नेपाल पशुपतिनगरका प्रमुख होम ढकालले प्रहरीको सहयोगमा ती महिलाको उद्धार गरिएको बताए । झापामा काम लगाउने भन्दै उनीहरुलाई सीमा कटाउन लागिएको थियो ।
उद्धार गरिएका महिलामा कञ्चनपुरका दुई, दार्चुला, बैतडी र अछामका एक एक जना रहेको इलामका प्रमुख जिल्ला अधिकारी श्रवणकुमार पोखरेलले बताए ।
राति आठ बजेको समयमा सीमा कटाउन लाग्दा शङ्कास्पद गतिविधि देखिएपछि सोधखोज गर्दा दलालले सिलिगडी लैजान लागेको खुलेको थियो ।
पक्राउ पर्नेमा दार्चुलाको महाकाली नगरपालिका ३ का १९ वर्षीय उपेन्द्र बडू, मालिकार्जुन गाउँपालिका ४ का २० वर्षीय सीता धामी र कञ्चनपुर देवकोट नगरपालिका २ का १९ वर्षीय सुशीला धामी छन् ।
