मोरङ-कोशी प्रदेश सरकारमा सहभागी हुने विषयमा नेपाली कांग्रेसका नेताहरूले आज छलफल गर्दैछन् । पार्टी सभापति शेरबहादुर देउवासँग छलफल तय भएको हो ।
कांग्रेस कोशी प्रदेश संसदीय दलका प्रमुख सचेतक गोपाल तामाङले प्रदेश सरकारमा सहभागी हुने मन्त्रीको नाम टुंगो लगाउन सभापति देउवासँग छलफल गर्न लागिएको बताए ।
सचेतक तामाङका अनुसार कांग्रेस संसदीय दलका नेता उद्धव थापा सम्भावित मन्त्रीहरूको सूची बोकेर छलफलका लागि काठमाडौँ जाँदैछन् ।
कांग्रेसभित्र देखिएको गुटगत राजनीतिका कारण मन्त्रीहरूको नाम टुङ्गो लाग्न नसकेको हो । सभापति देउबा नेताहरू शेखर कोइराला र कृष्णप्रसाद सिटौला पक्षधरबीच मन्त्रीको भागबण्डा मिलाउनुपर्ने अवस्था छ ।
