बिर्तामोड–वडा खेलकुद विकास समितिको आयोजनामा चौथो संस्करणको वडाध्यक्ष टोलस्तरीय फुटबल प्रतियोगिता चैत १६ देखि २५ गतेसम्म हुने भएको छ । समितिले पत्रकार सम्मेलन गरी प्रतियोगिताको तयारीबारे जानकारी दिएको हो ।
प्रतियोगिता बिर्तामोड वडा नम्वर १० स्थित महेन्द्रज्योति माविको खेल मैदानमा हुनेछ । खेलाडी उत्पादन तथा खेल विकास गर्ने उद्देश्यका साथ प्रतियोगिता सञ्चालन गर्न लागिएको वडा खेलकुद विकास समितिका अध्यक्ष सुरेन तुम्रोकले बताए ।
प्रतियोगिताको विजेताले नगद ३१ हजार प्राप्त गर्नेछ भने उपविजेता २१ हजार प्राप्त गर्नुका साथै दुवै टिमलाई मेडल, ट्रफी र सम्मानपत्रले सम्मान गरिनेछ । प्रतियोगिताको प्रत्येक खेलको म्यान अफ द म्याचले एक हजार पाउने जनाइएको छ ।
प्रतियोगिताको फाइनल खेलको दिन खुल्ला महिला म्याराथन दौड प्रतियोगिता पनि हुनेछ । पाँच किलोमिटर दूरीको उक्त प्रतियोगितामा प्रथम, दोस्रो, तेस्रो र चौथो हुनेले क्रमशः नगद ६ हजार, ४ हजार, २५ सय र १५ सय साथै मेडल र सम्मानपत्र पाउने नगर खेलकुद विकास समितिका उपाध्यक्ष सन्तोष गुरुङले बताए ।
