बिर्तामोड-झापामा शनिवार साँझयता आइतवार बिहानसम्म तीन जनाको मृत्यु भएको छ । दुर्घटनामा शिवसताक्षी नगरपालिका ७ घर भएकी २२ वर्षीया रोजी कटुवालले ज्यान गुमाएकी छन् ।
कटुवाल सवार मे १० प ६०१७ नम्बरको स्कुटीलाई शनिवार साँझ ना ३ ख ४३६४ नम्बरको ट्रकले बिर्तामोडको रामचोकमा ठक्कर दिएको थियो ।
प्रहरीका अनुसार झापाको बाह्रदशी गाउँपालिका–५ का ४५ वर्षीय गङ्गालाल माझीको शनिवार राति हत्या भएको छ । माझीलाई रडले हानेर मारेको आरोपमा मानपुर राजवंशी पक्राउ परेका छन् । उनलाई बिर्तामोड प्रहरीको हिरासतमा राखिएको छ ।
आइतबार बिहान २ बजे हात्तीको आक्रमणबाट दमक–३ दीपज्योति टोलका ४५ वर्षीय मीनबहादुर भण्डारीले ज्यान गुमाएका छन् ।
छिमेकी सुबिन भट्टराईको किचन भत्काउन लाग्दा भण्डारीले हात्तीलाई धपाउन खोजेका थिए । हात्तीले १०० मिटर परसम्म लखेटेर भण्डारीलाई लछारपछार पारेको इलाका प्रहरी कार्यालय दमकले जनाएको छ ।
