बिर्तामोड-पशुजन्य रोग लम्पी स्किन बढेपछि झापाको बिर्तामोड नगरपालिकाले पशु चौपायामा खोप लगाउन सुरु गरेको छ ।
नगरपालिकाको पशुपंक्षी तथा मत्स्य विकास शाखाले किसानका घर–घरमा पुगेर लम्पी स्किनविरुद्धको खोप अभियान सञ्चालन गरेको हो ।
लम्पी स्किनविरुद्ध खोप अभियान सञ्चालनका लागि बिर्तामोड नगरपालिकाले वडा तहमा १० जना पशु प्राविधिकको टोली परिचालन गरेको छ ।
किसान समेतको लागत सहभागितामा खोप अभियान सञ्चालन गरिएको पशुपंक्षी तथा मत्स्य विकास शाखा प्रमुख सावित्रा दाहालले बताइन् ।
बिर्तामोड नगरपालिकामा लम्पी स्किनको संक्रमणबाट २५ सय भन्दाबढी पशुचौपाया प्रभावित भएका छन् । अहिलेसम्म छ वटा पशुचौपाया मरेको पशुपंक्षी विकास शाखाले जनाएको छ ।
नगर क्षेत्रभित्रका १५ हजार पशु चौपायामा खोप लगाउने गरी नगरपालिकाले अभियान सुरु गरेको हो । त्यसका लागि नगरपालिकाले करिव १७ लाख रुपैयाँ खर्चिने जनाइएको छ ।
