झापा-स्वर सम्राट नारायण गोपालको ३४ औँ स्मृति दिवस बुधबार मनाइँदैछ । नेपाली सांगीतिक क्षेत्रका महान व्यक्तित्वका रूपमा नारायण गोपाललाई चिनिन्छ ।
अध्येता प्रकाश सायमी ३० वर्षको गायन यात्रामा नारायण गोपालले १३७ गीत गाएको बताउँछन् । १९९६ असोज १८ गते काठमाडौँको किलागलमा जन्मिएका नारायण गोपालका गीत कालजयी छन् ।
दार्जीलिङबाट आएका गोपाल योञ्जन, धनकुटाका नगेन्द्र थापा र नारायण गोपालको समूहले थुप्रै गीत गाएका छन् । उनीहरूको एउटा छुट्टै समूह थियो ।
थापाको गीत योञ्जनको संगीतमा नारायण गोपालले गाएका हुन् । २०४७ मङ्सिर १९ गते नारायण गोपालको निधन भएको थियो ।
संगीत प्रेमी विभिन्न क्षेत्रका सङ्घसंस्थाले नारायण गोपाल स्मृति दिवस मनाउँदै आएका छन् । झापामा पनि विभिन्न कार्यक्रम आयोजना गरिएको छ ।
नारायण गोपाल स्मृति प्रतिष्ठानको आयोजनामा झापाको बिर्तामोडमा नारायण गोपाल साँझ आयोजना हुँदैछ । बुधबार साँझ ५ बजे विराट ज्योति स्कुलमा कार्यक्रम आयोजना हुन लागेको प्रतिष्ठानका अध्यक्ष मोहन सिवाकोटीले बताए ।
साहित्य चौतारी झापाले पनि नारायण गोपाल स्मृति दिवस मनाउँदैछ । मासिक सांगीतिक काव्य सभाको कार्यक्रमसहित साहित्य चौतारीले स्मृति दिवस मनाउन लागेको हो ।
