झापा-नेपालको कृषिजन्य उत्पादन अलैँचीको मूल्य प्रतिमन करिब १ लाख हाराहारीमा पुगेको छ । एक दशकपछि अलैँचीको मूल्य उच्च बिन्दुमा पुगेको हो ।
एक दशकअघि १ लाख २० हजार रुपैयाँ सम्ममा कारोबार भएको अलैँचीको मूल्य घटेर प्रतिमन २० हजार रुपैयाँमा सीमित भएको थियो ।
नेपाल अलैँची व्यवसायी महासङ्घका अध्यक्ष निर्मल भट्टराईले सिजनको सुरुवातमै अलैँचीको मूल्य प्रति मन ९५ हजारदेखि १ लाखसम्म पुगेको बताए ।
‘यो एक दशकपछिको बढी मूल्य हो । यसले किसानमा उत्साह थपेको छ’, महासङ्घका अध्यक्ष भट्टराईले भने, ‘यसपटक अलैँचीको मूल्य घट्ने भन्दा पनि बढ्ने देखिन्छ।’
भारत र भुटानमा उत्पादन घटेका कारण नेपाली अलैँचीले भाउ पाएको अध्यक्ष भट्टराई बताउँछन् । मूल्य बढे पनि अलैँचीको उत्पादन भने घट्ने अनुमान गरिएको छ ।
गतवर्ष पनि अलैँचीको उत्पादन ५० प्रतिशतले घटेको थियो । नेपालका ५३ जिल्लामा अलैँची खेती विस्तार भएको छ । नेपालमा उत्पादित अलैँचीको मुख्य बजार भारत हो ।
