बिर्तामोड-महिला उद्यमी सङ्घ झापाले डिजिटल प्रविधिको प्रयोग गरी उत्पादनको बजारीकरणमा महिलाहरूलाई सघाउने नीति अगाडि सारेको छ ।
व्यावसायिक सीप तथा क्षमताको विकाससँगै उत्पादनको बजारीकरणका लागि संघले डिजिटल मार्केटिङलाई प्राथमिकतामा राखेको हाे ।
प्रविधिको प्रयोगमार्फत व्यवसायिक दायरालाई थप फराकिलो र व्यवस्थित बनाउने उद्देश्यले संघले डिजिटल मार्केटिङमा जोड दिएको अध्यक्ष सुष्मा भण्डारीले बताइन् ।
उद्यमी महिलाहरूलाई प्रविधिसँग जोड्दै लैजाने उद्देश्यले संघको आयोजनामा डिजिटल मार्केटिङ सम्बन्धी दुई दिने तालिम हालै बिर्तामोडमा आयोजना गरिएको छ ।
उद्यमशीलताको क्षेत्रमा जोडिएका ५० जना भन्दाबढी महिलाको सहभागितामा डिजिटल मार्केटिङ तालिम आयोजना गरिएको र त्यसले उत्पादनको बजारीकरणमा थप सहयोग पुग्ने अध्यक्ष भण्डारीको विश्वास छ ।
तालिममा बिमल राजवंशी, विकास कोइराला, साइमन बस्नेत र बासुदेव बाँस्तोलाले सहजीकरण गरेका छन् । सप्तकोशी विकास बैंकका प्रमुख कार्यकारी अधिकृत दिनेश पोखरेलको प्रमुख आतिथ्यमा तालिम समापन गरिएको छ ।
