झापा-इलाममा उत्पादन भएको चीज र घ्यूले बजार नपाउँदा उत्पादकहरु समस्यामा परेका छन् । अधिक उत्पादन र न्यून बिक्रीको समस्या भोग्ने अवस्थामा आएपछि उनीहरुले बजारको चिन्ता गर्न थालेका हुन् ।
चाडपर्वको समयमा पनि नौंनी घ्यू र चीज अपेक्षाभन्दा थोरै बिक्री हुँदा इलामका डेरी उद्योगहरु समस्यामा परेका छन् । डेरी उद्योगहरुले ६ महिनायता घ्यू र चीज स्टोरमै थन्क्याएर राखेका छन् ।
इलाममा डेढसय बढी डेरी उद्योग सञ्चालनमा छन् । सबै डेरीहरुले किसानबाट दुध संकलन गरी घ्यू, चीज र छुर्पी उत्पादन गर्दै आएका छन् । तर, पछिल्लो समय छुर्पी बाहक अन्य उत्पादनको बिक्री निराशाजनक छ ।
अधिकांश डेरीहरुमा कम्तिमा पाँच हजार किलोदेखि १८ हजार किलो नौंनी र चीजको ‘स्टक’ रहेको दुग्ध व्यवसायी संघले जनाएको छ । संघका अध्यक्ष जगत महतले वैशाख महिनायता घ्यू र चीज बिक्री हुन नसकेको बताए ।
