भद्रपुर-कैदीबन्दीको सरुवा प्रकरणमा तनाव व्यहाेरेकाे झापा कारागारले अन्ततः आइतबार कारागारका नाइके र पूर्व भाई नाइकेलाई सरुवा गरेको छ ।
कारागार व्यवस्था विभागको निर्देशन अनुसार झापा कारागारले नाइके लयप्रसाद सिवाकोटी र पूर्व भाई नाइके पासाङ शेर्पालाई अन्यत्र सरुवा गरिएको हाे ।
सिवाकोटीलाई झुम्का कारागार र शेर्पालाई केन्द्रिय कारागार काठमाडौँ सरुवा गरिएको झापा कारागारका प्रमुख मोहनलाल पनेरुले जानकारी दिए ।
कारागार प्रशासनले भाई नाइके मनोज लावतीलाई झुम्का कारागार सरुवा गर्न लागेको विरोधमा कैदीबन्दी आन्दोलित भएका थिए ।
कैदीबन्दीको आन्दोलनका कारण दुई दिनअघि तनावग्रस्त बनेको झापा कारागारले पूर्ववत् आफ्नो निर्णय सच्याउँदै सिवाकोटी र शेर्पालाई सरुवा गरेको हो ।
कैदीबन्दीको आन्दोलनको झड्काले स्थानीय प्रशासन लावतीको सरुवा गर्ने निर्णयबाट पछाडि हटेको छ । के कारण लावतीलाई सरुवा गर्न लागिएको थियो भन्ने विषयमा कारागार प्रशासन अझै स्पष्ट छैन् ।
