झापा-नेपाली कांग्रेसले स्थानीय तहको निर्वाचनमा पार्टीको जितलाई केन्द्रबिन्दुमा राख्न नेता कार्यकर्तालाई निर्देशन दिएको छ ।
पार्टीका उम्मेदवारलाई जिताउने गरी एकताबद्ध भएर चुनावी अभियानमा सक्रियतापूर्वक लाग्न कांग्रेसले यस्तो निर्देशन दिएको हो ।
पार्टीको स्थानीय तह उपनिर्वाचन केन्द्रीय संयोजन समितिले पार्टीका उम्मेदवारको पक्षमा जनमत जुटाउने गरी परिचालित हुन निर्देशन दिएको छ ।
पार्टीका महामन्त्री एवम् समितिका संयोजक विश्वप्रकाश शर्माको अध्यक्षतामा बुधबार बसेको बैठकले लोकतान्त्रिक पद्धतिप्रतिको आम नागरिकको विश्वासलाई अझै बलियो बनाउने गरी लाग्ने निर्णय गरेको छ ।
बैठकले सबै राजनीतिक दलहरूलाई उपनिर्वाचनमा हार्दिकताका साथ प्रस्तुत हुन, स्वच्छ र मर्यादित रूपमा प्रतिस्पर्धा गर्न अपिल गरेको महामन्त्री शर्माले बताए ।
रिक्त रहेका स्थानमा आगामी मङ्सिर १६ गते उपनिर्वाचन हुँदैछ । दलहरू उम्मेदवार छान्ने र मतदाता रिझाउने अभियानमा लागिरहेका छन् ।
निर्वाचनको पूर्व सन्ध्यामा कांग्रेसले आफ्नो पार्टीका उम्मेदवारको जित हासिल हुने गरी परिचालित हुन नेता कार्यकर्तालाई सार्वजनिक रुपमै निर्देशन दिएको हो ।
