आइतबारको सरकारी बिदा अवज्ञा गर्ने बिर्तामोड नगरपालिकाको निर्णय
- स्पीक कर्नरका सम्पादक न्यौपाने सम्मानित
- राष्ट्रिय टीममा फिर्ता आए सन्दीप
- मेची प्रादेशिक अस्पतालमा मन्त्रीको छड्के
- प्रथम अध्यक्षलाई अभिनन्दन गर्दै प्रेस चौतारी झापा
- बिर्तामोड नगरपालिकाद्वारा विपन्न जेष्ठ नागरिकलाई न्यानो कपडा वितरण
बिर्तामोड– झापाको बिर्तामोड नगरपालिकाले केन्द्र सरकारद्वारा पूर्व घोषित हरेक आइतवारको सरकारी बिदा कार्यान्वयन नगर्ने निर्णय गरेको छ ।
नगर प्रमुख पवित्रा महतारा प्रसाईको अध्यक्षतामा बसेको कार्यपालिका बैठकले सेवाग्राही र स्थानीय संघसंस्था समेतको मागका आधारमा आइतवारको बिदा कार्यान्वयन नगर्ने निर्णय गरेको हो ।
पेट्रोलियम पदार्थको खपत घटाउने जनाउँदै यसअघि केन्द्र सरकारले शनिवार र आइतवार गरी दुई दिन सरकारी कार्यालय बिदा दिने निर्णय गरेको थियो ।
आइतवार पनि सरकारी कार्यालय बिदा दिने केन्द्र सरकारको घोषित नीतिप्रति स्थानीय सरकारका तर्फबाट बिर्तामोड नगरपालिकाले पहिलोपटक कार्यपालिका बैठकमार्फत असहमति जनाएको छ ।
प्रतिस्पर्धी जमानामा दुई दिन बिदा गरेर हुँदैन’, नगर प्रमुख प्रसाईले भन्नुभयो, ‘दुई दिनको बिदाको औचित्य समेत पुष्टि नभएपछि स्थानीयको माग र आवश्यकताका आधारमा केन्द्र सरकारको निर्णय कार्यान्वयन नगर्ने निर्णय गरेका हौँ ।’
नगर प्रमुख प्रसाईले असार १ गतेदेखि साविक बमोजिम नगर क्षेत्रभित्रका सबै सरकारी कार्यालय र सामुदायिक विद्यालयहरु नियमित खुल्ने बताउनु भयो ।
जनस्तरबाट उठेको मागलाई गम्भीरतापूर्वक लिँदै केन्द्र सरकारको निर्णय अवज्ञा गर्ने बिर्तामोड नगरपालिका झापामा पहिलो स्थानीय तह हो । जिल्लाका अरु स्थानीय तह मौन प्राय छन् ।
असार १ गतेदेखि लागू हुने गरी आइतबार पनि कार्यालय खोल्ने र यसअघिको बिदा र समयलाई यथावत राख्ने निर्णय बैठकले गरेको छ ।
इलाम र ताप्लेजुङका स्थानीय तह पनि बिदा अवज्ञा गर्दै
प्रदेश १ मा इलामको दुई र ताप्लेजुङको एउटा स्थानीय तहले केन्द्र सरकारको निर्णय अवज्ञा गर्दै शनिबार मात्रै बिदा दिने नीति अख्तियार गरेका छन् ।
शनिबार र आइतबारको बिदा फलदायी नभएको ठहरमा पुगेका स्थानीय तहले शनिबार मात्रै सार्वजनिक बिदा दिने नीति लिएका हुन् ।
ताप्लेजुङको पाथीभरा याङवरक गाउँपालिका, इलामका देउमाई नगरपालिका र फाकफोकथुम गाउँपालिकाले आइतबारको बिदा कार्यान्वयन नगर्ने निर्णय गरेका छन् ।
इलामका दुवै स्थानीय सरकारका जनप्रतिनिधिले अघिल्लो साता जिम्मेवारी सम्हालेलगत्तै दुई दिने बिदा कार्यान्वयन नगर्ने निर्णय गरेका थिए ।
ताप्लेजुङको पाथिभरा याङवरकले यही साता यस्तो निर्णय लिएको हो । स्थानीय सरकारको निर्णयलाई कर्मचारी तथा विभिन्न कार्यालयले स्वीकार गरेको जनप्रतिनिधि बताउँछन् ।
इलाम फाकफोकथुम गाउँपालिकाका अध्यक्ष दीपेन्द्र खनालले दुई दिनको बिदाले स्थानीय नागरिकलाई सरकारी सेवा लिन पनि असहज हुने भएपछि शनिबार मात्रै बिदा दिने निर्णय लिएको बताउनु भयो ।