झापा– कोरोना भाइरसको संक्रमण अनियन्त्रित बन्दै जाँदा झापामा मानवीय क्षतिका घटना बढेका छन् । संक्रमणको बढ्दो लहरले दैनिकजसो मृतकको संख्या थपिने गरेको हो ।
जिल्ला स्वास्थ्य कार्यालय झापाका अनुसार आइतबार कोरोना संक्रमणका कारण पाँच जनाले ज्यान गुमाएका छन् । दुई जना पुरुष र तीन जना महिलाको मृत्यु भएको हो ।
संक्रमण शुरु भए यता झापामा आइतबार साँझसम्म ५ सय १५ जनाको मृत्यु भइसकेको छ । संक्रमणप्रति नागरिक तहबाट भएको बढ्दो वेवास्ताले जोखिम झन् बढेको हो ।
आइतबार झापामा १८४ जना संक्रमित थपिएका छन् । संक्रमितको संख्या दुई दिन यता केही घटे जस्तो देखिए पनि मानवीय क्षति भने रोकिएको छैन् ।
