झापा– शिक्षा तथा खेलकुद मन्त्रालयले जारी गरेको शैक्षिक परामर्श, भाषा शिक्षण तथा तयारी कक्षा सञ्चालन तथा व्यवस्थापन नियमावली, २०८३ का केही प्रावधानप्रति बिर्तामोड उद्योग वाणिज्य संघले कडा आपत्ति जनाएको छ ।
सोमबार विज्ञप्ति जारी गर्दै संघले निजी क्षेत्रसँग पर्याप्त परामर्शबिनै नियमावली लागू गरिएकाले धरौटी, पूर्वाधार, संस्थाको वर्गीकरण, अनुमति तथा नवीकरणलगायतका व्यवस्था अव्यावहारिक रहेको जनाएको छ ।
यस्ता प्रावधानले वैधानिक रूपमा सञ्चालनमा रहेका शैक्षिक परामर्श संस्था, भाषा शिक्षण केन्द्र र तयारी कक्षाको सञ्चालन थप खर्चिलो, जटिल र निरुत्साहित हुने संघको भनाइ छ ।
संघले आर्थिक मन्दी, लगानी सुस्तता र रोजगारी संकटको अवस्थामा थप नीतिगत जटिलताले व्यवसाय संकुचन, लगानी पलायन र बेरोजगारी बढाउने चेतावनी दिएको छ ।
यसले विद्यार्थी, अभिभावक र समग्र शिक्षा प्रणालीमै दीर्घकालीन नकारात्मक असर पार्ने दाबी गर्दै संघले विवादित प्रावधान तत्काल पुनरावलोकन गरी व्यवसायमैत्री र व्यवहारिक नियमावली ल्याउन सरकारसँग माग गरेको छ ।
संघका अध्यक्ष राजु न्यौपाने र महासचिव कुशल खतिवडाद्वारा हस्ताक्षरित विज्ञप्तिमा शिक्षा क्षेत्रको गुणस्तर कायम राख्दै निजी क्षेत्रको लगानी, रोजगारी र सेवा प्रवाह संरक्षण हुने गरी नीतिगत सुधार आवश्यक रहेको उल्लेख गरिएको छ ।
