२५ विधामा प्रतिस्पर्धा, करिब ७५० खेलाडी सहभागी हुने
भद्रपुर– आगामी मङ्सिरमा आयोजना हुने दशौँ राष्ट्रिय खेलकुद प्रतियोगितालाई लक्षित गर्दै झापामा जिल्लास्तरीय खेलाडी छनोट प्रतियोगिता आइतबारदेखि सुरु भएको छ ।
कोशी प्रदेश खेलकुद विकास बोर्डको कार्यक्रमअनुसार जिल्लाका विभिन्न स्थानमा २५ विधाका खेलमा प्रतिस्पर्धा सञ्चालन हुन लागेको हो ।
मेची रङ्गशालास्थित कभर्ड हलमा आयोजित उद्घाटन समारोहमा जिल्ला समन्वय समिति झापाकी उपप्रमुख शान्ता रोक्काले प्रतियोगिताको उद्घाटन गरिन् ।
झापा जिल्ला खेलकुद विकास समितिका अध्यक्ष शेखर कँडेलको अध्यक्षतामा भएको कार्यक्रममा प्रमुख अतिथि रोक्काले तेक्वान्दोका प्रशिक्षकलाई खेल सामग्री हस्तान्तरण गर्दै प्रतियोगिताको सुरुआत गरेकी थिइन् ।
जिल्ला खेलकुद विकास समितिका अनुसार प्रतियोगितामा करिब ७५० खेलाडी र एक सयभन्दा बढी प्रशिक्षक तथा निर्णायक सहभागी हुनेछन् । जिल्लास्तरीय छनोटबाट छानिएका खेलाडीले प्रदेशस्तरीय छनोट प्रतियोगितामा झापाको प्रतिनिधित्व गर्नेछन् ।
सीमित स्रोतसाधनका बाबजुद झापामा २५ विधाका खेल सञ्चालन गर्न लागिएको अध्यक्ष कँडेलले बताए । प्रतियोगितालाई व्यवस्थित, मर्यादित र पारदर्शी रूपमा सम्पन्न गरिने उनको भनाइ छ । उनले खेलाडी छनोटका लागि सहयोग गर्ने स्थानीय तह तथा सम्बन्धित पक्षलाई धन्यवाद दिँदै खेलाडीलाई उत्कृष्ट प्रदर्शन गर्न आग्रह गरे ।
पहिलो दिन मेची रङ्गशालामा तेक्वान्दो र ब्याडमिन्टनका खेल सञ्चालन भएका छन् । कनकाईमा भलिबल र बुद्धिचाल तथा दमकमा बुद्धिचालका प्रतिस्पर्धा हुने समितिका कार्यालय प्रमुख विष्णुकुमार नेम्बाङले जानकारी दिए ।
समितिका अध्यक्ष कँडेलका अनुसार भद्रपुरस्थित सेन्ट जेभियर्स स्कुलमा एथलेटिक्सका खेल हुनेछन् । दमकमा आईटीएफ कराते र बुद्धिचाल, कनकाईमा भलिबल, अर्जुनधारामा फुटबल, कराते, तेक्वान्दो र उसु तथा बिर्तामोडमा बक्सिङ, शारीरिक सुगठन, टेबलटेनिस र बास्केटबलका खेल सञ्चालन हुनेछन् ।
मेचीनगरमा क्रिकेटको छनोट प्रतियोगिता आयोजना गरिनेछ ।यसैगरी साइकलिङ, हक्की, रग्बी, पौडी, कुस्ती, सेपाकताक्रो र सुटिङका लागि दर्ता भएका खेलाडीले भने सिधै कोशी प्रदेशस्तरीय छनोट प्रतियोगितामा सहभागी हुन पाउनेछन् ।
उद्घाटन समारोहमा भद्रपुर नगरपालिकाका निवर्तमान प्रमुख तथा झापा गोल्डकपका महासचिव जीवनकुमार श्रेष्ठ, करातेका पूर्वप्रशिक्षक मदन उप्रेती, तेक्वान्दो सङ्घ झापाका अध्यक्ष कुमार भट्टराईलगायतले खेलाडीलाई शुभकामना दिएका थिए ।
समितिकी उपाध्यक्ष लक्ष्मी देवानले स्वागत गरेको कार्यक्रम सदस्य इन्दु न्यौपानेले सञ्चालन गरेकी थिइन् ।
