झापा– वैदेशिक रोजगार विभागले विभागीय स्वीकृतिविनै विदेशी विमानस्थल प्रयोग गरेर श्रमिकलाई वैदेशिक रोजगारीमा पठाउने थप ३९ म्यानपावर कम्पनीलाई ५०–५० हजार रुपैयाँ जरिबाना गरेको छ ।
विभागका अनुसार ती संस्थाले वैदेशिक रोजगार ऐन, २०६४ को दफा २२ विपरीत विदेशी विमानस्थलबाट श्रमिक पठाएको पुष्टि भएपछि दफा ५४ अनुसार दोस्रो पटक कसुर दोहोरिएको ठहर गर्दै कारबाही गरिएको हो ।
विभागले २०८२ चैत १ देखि २०८३ जेठ ३१ सम्म श्रम स्वीकृति लिएर विदेश गएका श्रमिकको उडान विवरण माग गरेको थियो । सो अवधिमा अनुमति नलिई विदेशी विमानस्थल प्रयोग गरेका तथा विवरण नबुझाएका गरी हालसम्म ५९८ म्यानपावर कारबाहीमा परिसकेका छन् ।
यसअघि विभागको निर्देशनपछि विवरण बुझाए पनि विदेशी विमानस्थल प्रयोग गरेको पुष्टि भएका ३९ संस्था अहिले जरिबानामा परेका हुन् । यस्तै, दुई पटकसम्म पनि विवरण पेश नगर्ने १२४ म्यानपावरसँग ५० हजार रुपैयाँ जरिबाना किन नगर्ने भन्दै सात दिनभित्र स्पष्टीकरण मागिएको विभागले जनाएको छ ।
