काठमाडौँ– श्रम संस्कृति पार्टीका अध्यक्ष तथा सांसद हर्क साम्पाङले सामुदायिक विद्यालयका विद्यार्थीका लागि दिइँदै आएको दिवा खाजा रकम वृद्धि गर्न सरकारसँग माग गरेका छन् ।
प्रतिनिधिसभामा शिक्षा मन्त्रालयको बजेटमाथिको छलफलका क्रममा बोल्दै उनले हाल प्रति विद्यार्थी प्रतिदिन दिइँदै आएको २० रुपैयाँ ‘अपर्याप्त’ भएको भन्दै यसलाई बढाएर ५० रुपैयाँ पुर्याउनुपर्ने बताएका हुन् ।
साम्पाङले भोको पेटले विद्यार्थीले गुणस्तरीय रूपमा पढ्न नसक्ने भन्दै दिवा खाजा कार्यक्रमलाई पोषण र सिकाइ सुधारसँग प्रत्यक्ष जोडेर हेर्नुपर्ने तर्क गरे । उनका अनुसार वर्तमान महँगीको अवस्थामा २० रुपैयाँले पोषणयुक्त खाजा उपलब्ध गराउन कठिन छ ।
नेपाल सरकारले सामुदायिक विद्यालयका बालविकासदेखि कक्षा ५ सम्मका विद्यार्थीलाई लक्षित गर्दै दिवा खाजा कार्यक्रम सञ्चालन गर्दै आएको छ । हाल देशभरका करिब २८ लाख विद्यार्थी यस कार्यक्रमबाट लाभान्वित भइरहेका छन् ।
सरकारले चालु आर्थिक वर्षका लागि दिवा खाजा कार्यक्रमलाई निरन्तरता दिँदै अर्बौँ रुपैयाँ बजेट विनियोजन गरेको छ । कार्यक्रमअन्तर्गत स्थानीय उत्पादनमा आधारित पोषणयुक्त खाजा उपलब्ध गराउने नीति रहे पनि बजेट र मूल्य वृद्धिको दबाबबीच हालको २० रुपैयाँको दर पुनरावलोकन गर्ने बहस लामो समयदेखि उठ्दै आएको छ ।
शिक्षा क्षेत्रमा सक्रिय सरोकारवालाहरूले पनि बढ्दो महँगीका कारण हालको रकम अपर्याप्त भएको टिप्पणी गर्दै आएका छन् । तर, बजेटको दायरा र राज्यको आर्थिक क्षमताबिच सन्तुलन मिलाउनुपर्ने चुनौती पनि सरकारसमक्ष रहेको देखिन्छ ।
यसैबीच साम्पाङको ५० रुपैयाँ पुर्याउने प्रस्तावपछि दिवा खाजा कार्यक्रमको गुणस्तर, पोषण मूल्य र बजेट व्यवस्थापनबारे पुनः राष्ट्रिय बहस सुरु भएको छ ।
