झापा– झापाको मेचीनगरमा मोटरसाइकल दुर्घटनामा परी एक सशस्त्र प्रहरी जवानको मृत्यु भएको छ।
मृत्यु हुनेमा पाँचथरको फिदिम नगरपालिका-१२ घर भई बाहुनडाँगीस्थित सशस्त्र प्रहरीको बोर्डर आउट पोस्टमा कार्यरत ३५ वर्षीय सशस्त्र प्रहरी सहायक हवल्दार सचिन तामाङ रहेका छन्।
जिल्ला प्रहरी कार्यालय झापाका अनुसार मंगलबार साँझ करिब साढे ५ बजे मदन भण्डारी राजमार्ग अन्तर्गत मेचीनगर-२ स्थित दुर्गा मन्दिर नजिक तिरिङ खोलाबाट बाहुनडाँगीतर्फ जाँदै गरेको मे ७ प ९६५ नम्बरको मोटरसाइकल अनियन्त्रित भई दुर्घटना भएको थियो।
दुर्घटनामा गम्भीर घाइते भएका तामाङको नाक तथा शरीरका विभिन्न भागमा चोट लागेको थियो। उनलाई उपचारका लागि बिर्तामोडस्थित बीएण्डसी अस्पताल लगिएकोमा साँझ ६:४५ बजे मृत्यु भएको प्रहरीले जनाएको छ।
मोटरसाइकल चालक अर्जुनधारा नगरपालिका–१ निवासी ४० वर्षीय सशस्त्र प्रहरी हवल्दार डिल्लीराम सुब्बा भने सामान्य घाइते भएका छन्। प्रहरीले घटनाबारे थप अनुसन्धान गरिरहेको जनाएको छ।
