काठमाडौँ-युवा पुस्ताको प्रदर्शनमा चरम दमन गरेपछि राजनीतिक वृत्तमा चर्को दबाब खेपिरहेका गृहमन्त्री रमेश लेखकले अन्तत राजीनामा दिएका छन् ।
जेनजी पुस्ताको सोमबारको प्रदर्शनमा प्रहरी दमन हुँदा कम्तिमा १९ जनाको मृत्यु भएपछि गृहमन्त्री लेखकमाथि राजीनामा गर्न चर्को दबाब परेको थियो ।
कांग्रेस सभापति शेरबहादुर देउवाले आकस्मिक रूपमा बोलाएको पदाधिकारी बैठकमा दिनभरको घटना ब्रिफिङ गर्दै गृहमन्त्री लेखकले राजीनामा घोषणा गरेका हुन् ।
बैठकमा महामन्त्री द्वय गगन थापा र विश्वप्रकाश शर्मा समेत सहभागी थिए । सर्वसाधारणको मृत्यु तथा घाइतेप्रति नैतिक जिम्मेवारी लिँदै गृहमन्त्रीले राजीनामा दिनु उपयुक्त भएको सुझाव बैठकमा आएको थियो ।
