मोरङ-कोशी प्रदेश सरकारका मुख्यमन्त्री हिक्मतकुमार कार्कीले हिउँदै अधिवेशनमा पर्याप्त विधेयक आउने बताउनुभएको छ ।
संघीयता कार्यान्वयन तथा प्रदेश कानुन निर्माणसम्बन्धी अध्ययन कार्यदलको प्रतिवेदन बुझ्दै मुख्यमन्त्री कार्कीले यस्तो धारणा व्यक्त गर्नुभएको हो ।
केही वर्षदेखि प्रदेशसभामा विधेयकहरू नआइरहेको गुनासो सार्वजनिक भइरहेका बेला मुख्यमन्त्री कार्कीले हिउँदै अधिवेशनमा पर्याप्त विधेयक आउने बताउनुभयो ।
संघीयताको कार्यान्वयनका लागि प्रदेश सरकारले थप कानुनहरू बनाउने र प्रभावकारी रूपमा कार्यान्वयन गर्ने बताउनुभयो ।
केन्द्र र प्रदेशबीच अधिकार क्षेत्रका विषयमा रहेका विवाद टुंग्याउनुपर्नेमा जोड दिँदै मुख्यमन्त्री कार्कीले कार्यदलले दिएको प्रतिवेदनका आधारमा अगाडि बढ्न सजिलो हुने विश्वास व्यक्त गर्नुभयो ।
