काठमाडौँ– पहिलो टी–२० खेलमा जिम्बावे ‘‘ए’ ले नेपाललाई पराजित गरेको छ । कीर्तिपुरस्थित त्रिवि मैदानमा आइतबार भएको खेलमा जिम्बावेले नेपाललाई ६ विकेटले पराजित गर्यो ।
नेपालले दिएको १८२ रनको लक्ष्य जिम्बावेले १८.५ ओभरमा ४ विकेटको क्षतिमा पूरा गर्यो ।
जिम्बावेका लागि कप्तान टोनी मुनयोङ्गा र ताडिवानाशे मारूमानीले अर्धशतक प्रहार गरे । मुरमानीले ५६ रन र कप्तान टोनीले ५० रन जोडे । त्यसअघि ओपर इनोसेन्ट काइयाले ३० बलमा ४७ रन जोडे ।
बलिङमा नेपालका डेब्यू खेलाडी बसिर अहमेदले २ विकेट लिए । करण केसी र सन्दीप लामिछानले १–१ विकेट हात पारे ।
त्यसअघि जिम्बावेले टस जितेर फिल्डिङ रोजेपछि पहिले ब्याटिङ गरेको नेपालले ५ विकेटको क्षतिमा १८१ रन जोड्यो ।
नेपालका लागि मध्यक्रमका ब्याट्सम्यान आदिल अन्सारीले उत्कृष्ट ब्याटिङ गरे । उनले २७ बलमा ४ चौका र ३ छक्काको मद्दतमा नटआउट ४७ रन जोडे ।
त्यसअघि ओपनर कुशल भुर्तेलले ४६ रन जोडे । उनले ३१ बलमा ८ चौका हिर्काए । आसिफ शेख ९ रनमा आउट भए ।
रोहितकुमार पौडेलले २६ बलमा ३६ रन र दीपेन्द्रसिंह ऐरीले रनआउट हुनुअघि १३ रनमा २८ रनको योगदान दिए ।
आरिफ शेख भने २ रनमै आउट भए । करण केसी ४ रनमा नटआउट रहे ।
बलिङमा जिम्बावेका ब्राड इभान्स, लुक जोङगे, ब्रान्डन माभुता र जोन मसाराले १–१ विकेट लिए ।
यसअघि शनिबारका तय भएको पहिलो एकदिवसीय खेल वर्षाका कारण स्थगित भएको थियो । एकदिवसीय खेल प्रभावित भएपछि पहिले टी–२० सिरिज गरिएको हो ।
दोस्रो टी–२० सोमबार मा र तेस्रो टी–२० वैशाख २१ मा हुनेछ ।
एकदिवसीय खेलहरू वैशाख २३, २४ र २६ गते हुनेछन् ।
नेपालले आइसिसी क्रिकेट विश्वकप लिग–२ खेल्न अमेरिका जानुअघि जिम्बावेको ए टिमसँग तयारीस्वरुप खेल्न लागेको हो ।
