झापा– कुलमान घिसिङ नेतृत्वको उज्यालो नेपाल पार्टीले नगरस्तरमा संगठन विस्तार गर्दै कोपिला लावतीको अध्यक्षतामा १५ सदस्यीय मेचीनगर समिति गठन गरेको छ ।
मेची उद्योग वाणिज्य संघको हलमा आज सम्पन्न पार्टीको प्रथम नगर सम्मेलनले लावतीको नेतृत्वमा नयाँ समिति चयन गरेको हो । समितिको उपाध्यक्षमा बुधराम हेमरन, सचिवमा केपी सिवाकोटी र कोषाध्यक्षमा रुपनारायण तामाङ चयन भएका छन् ।
समितिका सदस्यमा केशव आचार्य, तुलसा कट्टेल, राजीव गौतम, सुरज कार्की, प्रशंसा लामा, जितेन लावती, राजेश पराजुली, फुलकुमारी तुमरुक, प्रजिता थापा, रमेश रिजाल र भोगेन्द्र लावती चयन भएका छन् ।
नगर सम्मेलन तथा शुभकामना आदानप्रदान कार्यक्रमलाई सम्बोधन गर्दै पार्टीकी केन्द्रीय सचिवालय सदस्य किशोरी कार्कीले संगठन विस्तारसँगै जनतासँगको सम्बन्ध बलियो बनाउनुपर्ने बताइन् । स्थानीय नागरिकका आवश्यकता र समस्यालाई केन्द्रमा राखेर काम गर्न उनले नवनिर्वाचित समितिलाई आग्रह गरिन् ।
पार्टीका केन्द्रीय सदस्य सन्तोष आचार्यले संगठन निर्माणको आधार जनताको विश्वास भएको बताए । पार्टीका नीति र प्रतिबद्धतालाई व्यवहारमा उतार्दै जनताका मुद्दामा केन्द्रित हुनुपर्ने उनको भनाइ थियो ।
कार्यक्रममा पार्टीका केन्द्रीय सदस्य अग्निमाया मेचे, दुर्गा तामाङ र टुपेन्द्र एक्तेन, प्रदेश उपाध्यक्ष मेखबहादुर तामाङ, झापा अध्यक्ष सिके बेघा, युथ फ्रन्टका प्रमेश थापा, बुद्धिजीवी सुवर्ण भट्टराई र नागरिक अगुवा दिलिप सुब्बालगायत सहभागी थिए ।
नरेश लावतीको अध्यक्षतामा सम्पन्न कार्यक्रमको सञ्चालन केपी सिवाकोटीले गरेका थिए ।
