काठमाडौँ– यात्रुबाहक बसमा सवार एक व्यक्तिबाट ४७ ग्राम खैरो हेरोइन बरामद भएको छ। लागूऔषध नियन्त्रण ब्युरो शाखा कार्यालय नागढुंगाको टोलीले चन्द्रागिरि नगरपालिका-२ नागढुंगा चेकपोस्टमा जाँचका क्रममा उक्त लागूऔषध फेला पारेको हो।
ब्युरोका अनुसार बर्दियाबाट काठमाडौं आउँदै गरेको बसमा सवार बर्दियाको गुलरिया नगरपालिका-१ का २४ वर्षीय निकलेश गोटियाललाई शुक्रबार बिहान करिब ११:३० बजे जाँच गर्दा खैरो हेरोइनसहित पक्राउ गरिएको हो।
प्रारम्भिक अनुसन्धानका क्रममा गोटियालको संलग्नतामा काठमाडौं महानगरपालिका-४ धुम्बाराही बस्ने ४२ वर्षीय विजय थापालाई पनि पक्राउ गरिएको लागू औषध नियन्त्रण ब्युरोका सहप्रवक्ता प्रहरी नायव उपरीक्षक जीवन निरौलाले बताए ।
थापालाई सोही दिन दिउँसो करिब ५:३० बजे डिजिटल तराजु एक थानसहित नियन्त्रणमा लिइएको प्रहरीले जनाएको छ। पक्राउ परेका दुवै जनामाथि लागूऔषध नियन्त्रण ऐन, २०३३ अनुसार थप अनुसन्धान भइरहेको ब्युरोले जनाएको छ।
