झापा– तक्षशिला प्रोग्रेसिभ इंग्लिस स्कूलले ८०० भन्दा बढी विद्यार्थी संख्या पार गरेको ऐतिहासिक अवसरमा “तक्षशिला महोत्सव ३.०” भव्य रूपमा सम्पन्न गरेको छ । विद्यालयले नवप्रवर्तन, विश्वस्तरीय शिक्षा र शैक्षिक उपलब्धिलाई उत्सवका रूपमा मनाउँदै कार्यक्रम आयोजना गरेको हो ।
कार्यक्रममा विद्यालयका अध्यक्ष दुर्गा प्रसाई प्रमुख अतिथि तथा बी एण्ड सी मेडिकल कलेज टिचिङ अस्पतालका मेडिकल डाइरेक्टर प्रा. डा. बलभद्र प्रसाद दास विशेष अतिथिका रूपमा सहभागी हुनु भएको थियो ।
कार्यक्रममा अभिभावक, विद्यार्थी तथा विभिन्न विशिष्ट व्यक्तिहरूको उल्लेखनीय सहभागिता रहेको थियो ।महोत्सवको अवसरमा विद्यालयले इन्टरनेशनल ब्याकलोरियट (IB) क्यान्डिडेसी सुरु भएको घोषणा गरेको छ ।
द ड्युक अफ एडिनबर्ग्स इन्टरनेशनल अवार्ड कार्यक्रम पनि प्रारम्भ गरिएको छ । साथै इन्टरनेशनल एजुकेशन ओलम्पियाड (IEO) का उत्कृष्ट विद्यार्थीहरूलाई सम्मान गरिएको विद्यालयले जनाएको छ ।
कार्यक्रममा रोबोटमार्फत अतिथिलाई खादा अर्पण, ड्रोनबाट पुष्पवृष्टि तथा रोबोटद्वारा जुस सेवा जस्ता प्रविधिमैत्री गतिविधि प्रस्तुत गरिएको थियो ।
विद्यालयका विद्यार्थी र एआई टोलीको सहकार्यमा यी गतिविधि सम्पन्न गरिएको बताइएको छ । महोत्सवमा वर्ल्ड स्कूल समिट (WSS) अवार्ड हस्तान्तरण गरिएको थियो भने विज्ञान प्रदर्शनीमार्फत विद्यार्थीहरूले इन्फिनिटी मिरर, रेन डिटेक्सन सिस्टम, थ्रीडी प्रिन्टिङ, ३६० डिग्री क्यामेरा र ड्रोन प्रविधि जस्ता परियोजनाहरू प्रदर्शन गरेका थिए ।
विद्यालयका एकेडेमिक डाइरेक्टर डा. विक्टर इग्नाटियस जोसेफको नेतृत्वमा संस्थाले तीन वर्षको सफल यात्रा पूरा गर्दै नवप्रवर्तन र विश्वस्तरीय शिक्षातर्फ अघि बढिरहेको जनाएको छ । महोत्सवअघि आयोजित वार्षिक खेलकुद कार्यक्रमले पनि विद्यार्थीहरूको प्रतिभा र उत्साह झल्काएको विद्यालयले जनाएको छ ।
