काठमाडौँ– नेपाली साहित्यका शिखर पुरुष राष्ट्रकवि माधवप्रसाद घिमिरेको स्मृतिलाई चिरस्थायी बनाउँदै साहित्य सेवामा समर्पित स्रष्टाहरूलाई सम्मान गर्ने उद्देश्यले २७ लाख रुपैयाँको अक्षय कोष स्थापना गरिएको छ ।
मर्स्याङ्दी वाङ्मय प्रतिष्ठानका अध्यक्ष विजयराज न्यौपानेको अध्यक्षतामा शनिबार साँझ बसेको बैठकले यस महत्त्वपूर्ण निर्णय गरेको हो ।
अक्षय कोषका लागि राष्ट्रकविकी धर्मपत्नी महाकाली घिमिरेले उदारतापूर्वक १६ लाख रुपैयाँ प्रदान गरेकी छिन् भने परिवारका अन्य सदस्यहरूबाट थप रकम जुटाई कुल २७ लाखको कोष खडा गरिएको छ ।
प्रतिष्ठानका कोषाध्यक्ष लक्ष्मण थापाका अनुसार, प्रत्येक वर्ष राष्ट्रकविको जन्मजयन्तीको शुभ अवसर पारेर असोज ७ गते एक जना विशिष्ट साहित्यकारलाई नगद १ लाख रुपैयाँसहित ‘माधवप्रसाद घिमिरे पुरस्कार’ प्रदान गरिनेछ ।
यसअघि कोषमा १६ लाख रुपैयाँ मौज्दात रहेकोमा परिवारजनको थप सहयोगले कोषको आकार बढेको हो । यस अक्षयकोषको स्थापनाले नेपाली साहित्यको श्रीवृद्धिमा योगदान पुर्याउने स्रष्टाहरूलाई प्रोत्साहन मिल्ने विश्वास गरिएको छ ।
राष्ट्रकवि घिमिरेको २०७७ भदौ २ गते १०१ वर्षको उमेरमा निधन भएको थियो । रामविलास बाट खण्डकाव्यको यात्रा सुरु गरेका कवि घिमिरेको २०१५ मा प्रकाशित गरेको गौरी खण्डकाव्य सबैभन्दा चर्चित खण्डकाव्य हो ।
