उर्लाबारी-सर्वसाधारणको स्वास्थ्यसँग प्रत्यक्ष जोडिएको औषधि पसल नै प्रतिबन्धित लागूऔषधको अवैध कारोबारको केन्द्र बनेको रहस्य खुलेको छ ।
मोरङको केराबारी गाउँपालिका-७ स्थित एक मेडिकल सञ्चालकलाई प्रहरीले ठूलो परिमाणमा प्रतिबन्धित औषधि सहित पक्राउ गरेपछि यो तथ्य बाहिर आएको हो ।
प्रहरीले केराबारीस्थित ‘मुगु मेडिकल’ का सञ्चालक, बेलबारी नगरपालिका-८ का २८ वर्षीय मनिष कुँवरलाई पक्राउ गरेको छ ।
उक्त मेडिकलबाट प्रतिबन्धित औषधिको कारोबार भइरहेको भन्ने विशेष सूचनाका आधारमा इलाका प्रहरी कार्यालय केराबारी र लागूऔषध नियन्त्रण ब्युरो विराटनगरको संयुक्त टोलीले छापा मारेको थियो ।
छापा मार्ने क्रममा मेडिकलभित्र चलाखीपूर्वक लुकाइराखेको अवस्थामा प्रतिबन्धित औषधिहरू डिकोलिक ४ हजार ५ सय ट्याब्लेट र ट्रामाडोल ४ हजार ५ सय ट्याब्लेट गरी कुल ९ हजार ट्याब्लेट बरामद भएको प्रहरीले जनाएको छ ।
बिरामीलाई जीवनदान दिने पवित्र स्थलकै दुरुपयोग गरी लागूऔषधको सञ्जाल चलाएको आरोपमा पक्राउ परेका कुँवरमाथि थप अनुसन्धान भइरहेको छ ।
