महोत्तरी– नेकपा एमालेका महासचिव शंकर पोखरेलले मधेस सरकारमा नेकपा एमाले सामेल भएपछि उपभोक्ता समितिको नाममा बजेट खाने परम्परा अन्त्य भएको बताउनुभएको छ ।
नेकपा एमाले महोत्तरीद्वारा रामगोपालपुरमा आयोजित वृहत् पार्टी प्रवेश तथा जनसभालाई सम्बोधन गर्दै महासचिव पोखरेलले यस्तो धारणा व्यक्त गर्नुभएको हो ।
महासचिव पोखरेलले अहिले मधेसमा एमाले सरकारको एउटा अंश मात्र भएको बताउँदै एमालेले नेतृत्व गर्ने हो भने मधेसका जनताको अपेक्षा अनुसार काम गरेर देखाउने दाबी गर्नुभयो ।
विगतमा मधेसमा एमाले आउन खोज्दा एमाले मधेस विरोधी पार्टी हो भन्ने भ्रम फिँजाइएको र केपी ओलीलाई मधेस विरोधी नेताको रूपमा चित्रित गर्ने प्रयास गरिएको उहाँले स्मरण गराउनुभयो ।
भारत सरकारले लामो समयसम्म काम नगरेर अलपत्र पारेको हुलाकी राजमार्ग केपी ओली प्रधानमन्त्री हुँदा बनाएको उहाँले बताउनुभयो ।
एसियाली विकास बैङ्कसँग सहायता लिएर पूर्वपश्चिम राजमार्गसँग तराइका सदरमुकामलाई जोड्ने र तराई मधेसका सबै सदरमुकाम आधुनिकीकरण गर्ने काम पनि नेकपा एमाले नेतृत्वकै सरकारले गरेको उहाँले बताउनुभयो ।
