मोरङ-१६ वर्षअघि भएको हत्यामा संलग्न रहेका दुई जनालाई मोरङ प्रहरीले पक्राउ गरेको छ ।जिल्ला प्रहरी कार्यालय मोरङका अनुसार मिक्लाजुङ गाउँपालिका–१ का सन्तोष राईको हत्या आरोपी धनकुमार राई र देवीप्रसाद राईलाई पक्राउ गरिएको हो ।
मोरङका प्रहरी प्रवक्ता प्रहरी नायव उपरीक्षक रञ्जनकुमार दाहालका अनुसार २०६४ जेठ २० गते राति ३५ वर्षीय सन्तोष राईलाई धनकुमार राईले कुटपिट गर्दै हत्या गरी जंगलमा गाडेका थिए ।
घटनापछि हत्यामा संलग्न राईविरुद्ध प्रहरीले मुद्दा अघि बढाएको थियो । २०६७ सालमा जिल्ला अदालत मोरङले धनकुमार र देवीप्रसाद दुवै जनालाई ५–५ वर्षको कैद सजाय तोकेको थियो ।
फरार रहेका धनकुमारलाई कार्तिक २ र देवीप्रसादलाई कार्तिक ५ गते पक्राउ गरिएको थियो । पक्राउ परेका दुवै जनालाई प्रहरीले मंगलबार जिल्ला अदालत मोरङमा पेश गरेको छ ।
