काठमाडौं– स्थापनाको छोटो समयमै राष्ट्रिय राजनीतिमा स्थान बनाएको नागरिक उन्मुक्ति पार्टी (नाउपा) भित्रको आन्तरिक कलह उत्कर्षमा पुगेको छ ।
पार्टीले आफ्नै अध्यक्ष रञ्जिता श्रेष्ठ चौधरीलाई पदबाट बर्खास्त गरेको छ । विधानविपरीत गतिविधि गरेको गम्भीर आरोप लगाउँदै पार्टीले उनलाई अध्यक्ष पदबाट हटाउने निर्णय गरेको हो ।
यो नाटकीय घटनाक्रमपछि पार्टीले अध्यक्ष पदबाट रञ्जितालाई हटाइएको औपचारिक जानकारी मंगलबार नै निर्वाचन आयोगमा दर्ता गराइसकेको छ, जसले पार्टीभित्रको विभाजनलाई कानुनी रूप दिने प्रयास गरेको छ।
अध्यक्ष श्रेष्ठमाथि लगाइएको मुख्य आरोप पार्टीको विधानलाई ठाडै उल्लंघन गर्दै कार्यवाहक अध्यक्ष तोक्नु हो । यही विषयलाई लिएर रामलाल डगौराको संयोजकत्वमा रहेको पार्टीको अनुशासन समितिले उनीसँग २४ घण्टे स्पष्टीकरण माग गरेको थियो ।
तर, अध्यक्ष श्रेष्ठले तोकिएको समयसीमाभित्र कुनै स्पष्टीकरण नदिएपछि अनुशासन समितिले उनलाई पदबाट हटाउने कठोर निर्णय लिएको हो । समितिमा डगौर्यासँगै सुनिता चौधरी र पुण्य बुढा सदस्य छन् ।
राष्ट्रिय भेलाले अनुमोदन गर्ने
अनुशासन समितिको यो निर्णयलाई काठमाडौंको मध्यबानेश्वरमा जारी पार्टीको राष्ट्रिय भेलाले अनुमोदन गर्ने तयारी छ । यो घटनाले नागरिक उन्मुक्ति पार्टीको भविष्य र यसको आन्तरिक लोकतन्त्रमाथि गम्भीर प्रश्न उठाएको छ।
