बिर्तामोड– झापामा हुने राष्ट्रियस्तरको ‘मिस्टर कञ्चनजंघा’ खुला शारीरिक सुगठन प्रतियोगिताका विजेताले थाइल्यान्डमा हुने एसियन च्याम्पियनसिपमा सहभागी हुँदा लाग्ने सम्पूर्ण खर्च आयोजकबाट पाउने भएका छन् । प्रतियोगिताको ओभरअल च्याम्पियनको सहभागिता, आउजाउ र थाइल्यान्डमा बसोबासको खर्च आयोजकले व्यहोर्ने भएको हो ।
बडी ग्यारेज शारीरिक सुगठन क्लबको बैठकले यस्तो निर्णय गरेको नेपाल शारीरिक सुगठन तथा फिटनेस महासंघ कोशी प्रदेशका अध्यक्ष आदित्य पराजुलीले बताए । उनका अनुसार आगामी नोभेम्बर १३ देखि १६ तारिखसम्म थाइल्यान्डको पटायास्थित ब्राइटन ग्रान्ड होटल एन्ड कन्भेन्सनमा हुने आइएफबिबी एसियन च्याम्पियनसिपमा सहभागी हुने खेलाडीको खर्च आयोजकले व्यहोर्नेछ ।
प्रतियोगिताका कार्यक्रम संयोजक तथा बडी ग्यारेज शारीरिक सुगठन क्लबका सञ्चालक राम दाहालले प्रतियोगिताको तयारी पूरा भएको बताए । उनका अनुसार असोज २० गते प्रिजजिङ र २१ गते फाइनल प्रतिस्पर्धा हुनेछ ।
कोशी प्रदेशमा पहिलोपटक राष्ट्रियस्तरमा आयोजना हुन लागेको प्रतियोगिताको तेस्रो संस्करणमा पुरुषतर्फ ५५, ६०, ६५, ७०, ७५ र ७५ केजीभन्दा माथिका तौल समूहमा प्रतिस्पर्धा हुनेछ । महिलातर्फ खुला प्रतिस्पर्धा गराइनेछ ।
प्रतियोगिताको ओभरअल विजेताले पाँच लाख रुपैयाँ नगद पुरस्कार पाउने आयोजक समितिका अध्यक्ष पदम श्रेष्ठले बताए । अघिल्लो संस्करणमा विजेताले तीन लाख ११ हजार १११ रुपैयाँ पाएका थिए ।
दोस्रो हुनेले तीन लाख, तेस्रोले दुई लाख, चौथोले एक लाख, पाँचौँले ७५ हजार र छैटौँ हुनेले ५० हजार रुपैयाँ पाउनेछन् । प्रत्येक तौल समूहका दोस्रो र तेस्रो हुने खेलाडीलाई क्रमशः सात हजार र पाँच हजार रुपैयाँ प्रदान गरिनेछ भने बाँकी तीन खेलाडीलाई ट्रफी र मेडल दिइनेछ ।
महिलातर्फ प्रथम हुनेले एक लाख, दोस्रोले ५० हजार र तेस्रो हुनेले २५ हजार रुपैयाँ पाउने कोषाध्यक्ष शारदा दाहालले जानकारी दिइन् । कोशी प्रदेशमा पहिलोपटक महिला विधालाई प्रतियोगितामा समावेश गरिएको हो ।
देशभरबाट करिब दुई सय खेलाडी सहभागी हुने अपेक्षा गरिएको प्रतियोगिताका सचिव हिमाल खरेलले बताए । प्रतियोगिता सम्पन्न गर्न करिब ३५ लाख रुपैयाँ खर्च हुने अनुमान गरिएको छ ।
यसैबीच प्रतियोगिताका विजेताले प्राप्त गर्ने ट्रफी र मेडलको अनावरण गरिएको छ ।
