बिर्तामोड-नेपाली कांग्रेस झापाले विभिन्न ३५ वटा विभागीय समितिका संयोजक एवम् सदस्य तोकेको छ । सभापति देउकुमार थेबेले कांग्रेसको विधान धारा १२ को उपधारा ७ (ज) बमोजिम विभागीय संयोजक एवम् सदस्य तोक्नु भएको हो ।
सभापति थेबेले संगठन विभाग आफ्नै नेतृत्वमा राख्नु भएको छ । उपसभापति केशवराज पाण्डेलाई प्रशिक्षण प्रतिष्ठान विभागको संयोजक तोकिएको छ ।
अनुगमन मूल्याङ्कन तथा अभिलेख विभागमा उपसभापति शेरबहादुर भट्टराई संयोजक चयन हुनुभएको छ । शुभेच्छुक संस्था समन्वय विभागको संयोजकमा सचिव कृष्ण हुमागाई चयन हुनु भएको छ ।
सचिव नवीन बिमलीलाई नेविसंघ तथा तरुण विभाग संयोजकको जिम्मेवारी दिइएको छ । कोषाध्यक्ष जलकुमार गुरुङले आर्थिक विभाग संयोजकको जिम्मेवारी पाउनुभएको छ ।
सहसचिव कमलप्रसाद भण्डारीले कृषि तथा भूमिसुधार संयोजक र अर्का सहसचिव कालेन्द्रप्रसाद सिंह राजबंशीले स्थानीय तह समन्वय विभाग संयोजकको जिम्मेवारी पाउनुभएको छ ।
नेपाली कांग्रेसले सूचना सञ्चार तथा प्रचारप्रसार विभागको संयोजकमा रश्मीशेखर सुवेदीलाई जिम्मेवारी दिएको छ । आदिवासी जनजाति विभागको संयोजकमा धर्म लक्सम्वा छानिनुभएको छ ।
युवा तथा खेलकुद विभागको संयोजकमा बिनोद बस्नेतलाई जिम्मेवारी दिइएको छ । दुर्गाप्रसाद सापकोटाले सहकारी विभाग संयोजकको जिम्मेवारी पाउनुभएको छ ।
