झापा– बिर्तामोडका युवा व्यवसायी तथा सामाजिक व्यक्तित्व गौरीप्रसाद तथा लक्ष्मी भण्डारीले छोराको जन्मदिनमा ‘स्वच्छ समाजका लागि सामाजिक अभियान’ लाई आर्थिक सहयोग गरेका छन् ।
शनिबार पर्न गएको छोरा सन्देशको जनदिनको अवसर पारेर अभियानलाई गौरीले ३५ हजार सहयोग प्रदान गरेका हुन् । भण्डारीका छोरा सन्देश कक्षा १० मा न्युटन्स् एजुकेशन एकेडेमीमा अध्ययनरत छन् ।
विगत एकदशक भन्दाबढी समयदेखि सडकमा यत्रतत्र फ्याँकिएका प्लाष्टिक तथा कबाडी सङ्कलन गरेर अनाथ आश्रम बनाउने अभियानमा होमिएका बिर्तामोड-६ का सामाजिक अभियन्ता तथा अभियानका अध्यक्ष गणेश ढुंगाना, अभियानका आजीवन सदस्य बीपी कोइरालालाई गौरी तथा उनका छोरा सन्देशले संयुक्त रूपमा सो रकम बराबरको चेक हस्तान्तरण गरेका हुन् ।
अनाथ दिन दुःखी तथा सडकमा आश्रित मानवलाई राख्न ढुङ्गानाको अग्रसरतामा अर्जुनधारा ११ स्थित देउलिया पुलको करिब सात सय मिटर उत्तर क्षेत्रमा दुई कठ्ठा सात धुर जग्गा अभियानका नाममा खरिद गरिएको छ ।
जग्गा अभियानको नाममा आइसके पनि जग्गाधनीलाई अझै करिब सात लाख रुपैयाँ जति तिर्न बाँकी रहेको अभियानका संयोजक समेत रहेका अभियन्ता ढुंगानाले बताए ।
ढुङ्गानाको यो अभियानलाई नजिकबाट हेरिरहेका भण्डारीले जन्मदिनमा गरिने फजुल खर्चलाई कटौती गर्दै समाज रूपान्तरणमा सहयोग गर्ने अठोटका साथ छोराको जन्मदिनमा केही थोरै भए पनि सहयोग गरिएको बताए ।
