बिर्तामोड– बिर्तामोडका अर्नभ बन ‘द भ्वाइस किड्स नेपाल सिजन २’ को फाइनल राउण्डमा प्रवेश गरेपछि देशभर उनलाई भोटिङ गर्नेको संख्या बढेको छ । बिर्तामोडको ग्रीनफिल्ड वल्र्ड स्कुलमा अध्ययनरत १२ बर्षीय अर्नभलाई देशभरका समर्थकले फिनालेसम्म पुर्याएका हुन् ।
आफ्नै बिद्यालयका बिद्यार्थीले समेत विभिन्न समूह बनाएर उनलाई भोटिङ गर्दै बिजेता बनाउन सबै समक्ष आग्रह गरिरहेका छन् ।
स्वर र प्रस्तुतिका कारण निर्णायक र समर्थकको रोजाईमा परेका उनलाई शुक्रवार बेलुका ८ बजेभन्दा अघिसम्म भोट गर्न सकिन्छ ।
भोटिङ राउण्ड टप २४ बाट १६ हुँदै टप ८ (फिनाले) राउण्डमा प्रवेश गरेका अर्नभलाई भोटिङ गर्न झापा, इलामसहित देशभर नै समूह गठन गरिएको छ ।
झापाको बिर्तामोड, बुधवारे, दमक, चन्द्रगढी, धुलाबारी, इलामको फिक्कल, इलाम बजार, कन्याम, पशुपतिनगर, काठमाडौंसहित बिभिन्न स्थानमा अर्नभका समर्थकले समूह बनाएर भोटिङ गरिरहेका छन् ।
सानैदेखि गीत संगीतमा रुचि राख्दै आएका अर्नभलाई धेरै भन्दा धेरै भोट गरेर बिजेता बनाइदिन उनका बुबा आशिष बनले आग्रह गरेका छन् ।
अर्नभकी आमा जीना सापकोटाले टिम प्रविशामा रहेका अर्नभलाई खल्ती एप्प डाउनलोड गरेर भोट गरी विजेता बनाउन अनुरोध गरेकी छिन् ।
गायनमा आधारित टेलिभिजन रियालिटी शो ‘द भ्वाइस किड्स नेपाल सिजन २’ को फाइनल राउन्ड हिमालय टेलिभिजनमा जेठ ५ गते शुक्रबार राति ८ बजे प्रशारण हुनेछ ।
