प्रतिदिन दैनिक १५ औँ वर्षमा

मुख्य मन्त्रीका दावेदार कार्की भन्छन्, ‘एमालेको नेतृत्वमा सरकार बन्छ’

झापा–नेकपा एमालेबाट प्रदेश १ को मुख्यमन्त्रीका दाबेदार हिक्मतकुमार कार्कीले एमाले नेतृत्वमा सरकार गठन हुने बताएका छन् ।

प्रदेश १ को प्रत्यक्षतर्फ सुनसरीको ३ (२) मा पनि एमालेका उम्मेदवार रामदेव यादव विजयी भएसँगै सत्ता गठबन्धनको सरकार बन्ने सम्भावना कमजोर बनेको छ ।

‘प्रदेश १ मा एमाले नेतृत्वमा सरकार बन्छ, ढुक्क हुनुहोस्’, कार्कीले भने, ‘अहिले धेरै खालका कसरत भइरहेका छन्, तर हाम्रो पार्टी एमालेको नेतृत्वमै सरकार बन्ने हो ।’ उनले एमालेले सर्वसम्मत संसदीय दलको नेता छान्ने पनि दाबी गरे ।

‘हाम्रो पार्टीले संसदीय दलको नेता सर्वसम्मत छान्छ’, कार्कीले भने, ‘मेरो नाममा सहमति हुन्छ भन्ने मेरो विश्वास छ ।’ प्रदेश १ को ५६ वटा प्रदेश निर्वाचन क्षेत्रमध्ये प्रत्यक्षमा एमाले–राप्रपा–जसपाको गठबन्धनको सिट संख्या २७ पुगेको छ ।

यता सत्ता गठबन्धन दलहरू नेपाली काँग्रेस, नेकपा माओवादी केन्द्र र नेकपा एकीकृत समाजवादीले प्रत्यक्षमा २९ सिट जितेको छ । प्रदेशमा सरकार गठनका लागि आवश्यक संख्या ४७ चाहिन्छ ।

९३ सदस्यीय प्रदेशसभामा प्रत्यक्षतर्फ २ सिटको अन्तर भए पनि समानुपातिक तर्फको मतमा देखिएको अग्रताले एमाले(राप्रपा(जसपाको गठबन्धनले बहुमत पाउने देखिन्छ । प्रदेश १ मा समानुपातिक मतमा एमाले पहिलो छ ।

कूल सदर १७ लाख १५ हजार ५०७ मत गणना हुँदा एमालेले ५ लाख ९९ हजार ९५९ मत ल्याएको छ । दोस्रो स्थानमा रहेको नेपाली काँग्रेसले ५ लाख ३ हजार १६३, राप्रपाले तेस्रो स्थानमा १ लाख ८२ हजार ९०९ मत पाएको छ ।

चौथो स्थानमा रहेको माओवादी केन्द्रले १ लाख ६८ हजार ७३४, जसपाले ५५ हजार ३१७ र नेकपा एसले ५० हजार ८७५ मत पाएको छ ।

यस्तै संघीय लोकतान्त्रिक राष्ट्रिय मञ्चले २६ हजार ३६ मत पाएको छ । अन्य पार्टीहरुले थ्रेस होल्ड अर्थात् १ दशमलव ५ प्रतिशत मत कटाएका छैनन् ।

You may also like...

Leave a Reply

Your email address will not be published. Required fields are marked *