- झापाका एन्फा रेफ्री लोकराज ढुंगानाको निधन
- शरणार्थी नेता रिजाललाई धरौटीमा रिहा गर्न आदेश
- ११ महिनामा नेपाल भित्रिए नौ लाख विदेशी पर्यटक
- हारेर पनि समूह बिजेता बन्यो झापा गाउँपालिका
- शब्दपत्र डटकमका सम्पादक पुरी पुरस्कृत
झापा– नेकपा एमालेका अध्यक्ष केपी शर्मा ओलीले मुलुक अघोषित रुपमा दुई दलीय व्यवस्थामा गइसकेको बताएका छन् । झापाको विभिन्न स्थानमा मंगलबार आयोजित चुनावी सभालाई सम्बोधन गर्दै एमाले अध्यक्ष ओलीले एकातिर गठवन्धनमा आवद्ध काङ्ग्रेससहितका सत्तारुढ दलहरू र अर्कातिर एमाले एक्लै चुनावी प्रतिस्पर्धामा उत्रिएको बताएका हुन् ।
‘अरु दल जोडजाड गरेर गठबन्धनका नाममा एमालेविरुद्ध लागेका छन्’, अध्यक्ष ओलीले भने, ‘अरु सबै एकातिर उभिएर चुनौति दिए पनि एमाले आफ्नै शक्तिको बलमा उभिएको छ । उसलाई कसैले हल्लाउन पनि सक्दैन।’ उनले हत्तपत्त यो गठबन्धन टुटिहाल्ला कि भन्ने डर रहेको बताउँदै पाँचै जना (दल) लाई एकैपटक ‘कर्याककुरुक’ पारेर फाल्दिनु जति रमाइलाे केहीमा नहुने बताए ।
‘पाँचदलीय गठबन्धनका नाममा जतिसुकै घेराबन्दी भए पनि स्थानीय तह निर्वाचनमा एमालेको बिजय यात्रालाई कसैले रोक्न सक्दैन’, अध्यक्ष ओलीले भने । उनले पाँच दलीय गठबन्धन टुटोस् भन्ने आफूहरूको चाहना नभए पनि यसले लुतोको जस्तो लक्षण देखाइरहेको टिप्पणी गरे ।
‘हिजो बम हान्ने र टाउकाको मोल तोक्नेहरु आज एकैठाउँ बसेर उद्देश्यहीन तमासा गरिरहेका छन्’, एमाले अध्यक्ष ओलीले कटाक्ष गर्दै भने, ‘ठूलो जस्तो नदेखिने, निको पनि नहुने तर चिलाइरहने लुतो जस्तो छ पाँचदलीय गठबन्धन ।’ उनले गठबन्धन दलले सञ्चालन गरेको अर्थतन्त्र, शान्ति सुव्यवस्था र विकास जता हेरे पनि लुतो जस्तो चिलाइरहेको बताए ।
देश विकासको अभियानमा होमिएको एमालेलाई छेक्न गरिएका प्रयास स्थानीय तह निर्वाचन परिणामले असफल पारिदिने बताउँदै अध्यक्ष ओलीले पाँच दलीय गठबन्धन आत्तिसकेको दाबी गरे । ‘काङ्ग्रेसले जारी गरेको घोषणापत्रमा मेरो नाउँ बयालीस ठाउँमा रहेछ’, अध्यक्ष ओलीले भने, ‘उहाँहरुले आफ्नै सभापतिको नाउँचाहिँ आठ ठाउँ मात्रै राख्नु भएको छ । यसले के देखाउँछ ?’
एमाले अध्यक्ष ओलीले पारिवारिक भागबन्डाको हिसाब मिलाउँदा मिलाउँदै नेकपा माओवादी केन्द्रले घोषणापत्र ल्याउन बिर्सिएको टिप्पणी गरे । व्यस्त कार्यतालिका बीच गृह जिल्ला आएका ओलीले झापाको भद्रपुर, हल्दीवारी, धुलावारी, बिर्तामोड लगायतका स्थानमा आयोजित चुनावी सभालाई सम्वोधन गर्दै एमालेको पक्षमा मतदान गर्न सार्वजनिक अपिल पनि गरेका छन् । उनले झापाका स्थानीय तहमा एमालेका उमेद्वार विजयी हुने पनि दाबी गरे।
