प्रतिदिन दैनिक १५ औँ वर्षमा

झापाका २ लाख बालबालिकालाई टाइफाइडविरुद्धको खोप लगाउने तयारी


बिर्तामोड– सरकारले बालबालिकालाई टाइफाइडविरुद्धको खोप लगाउने भएको छ । देशव्यापी अभियान अन्तरगत चैत २५ गतेदेखि झापाका बालबालिकालाई खोप लगाउने तयारी भइरहेको हो ।

जिल्ला स्वास्थ्य कार्यालय झापाले आज बिर्तामोडमा पत्रकार सम्मेलन गरी झापाका २ लाख १५ हजार ३५० बालबालिकालाई टाइफाइडविरुद्धको खोप लगाइने जनाएको छ ।

स्वास्थ्य कार्यालयका खाेप अधिकृत ईश्वरी पौडेलले १५ महिनादेखि १५ वर्षसम्मका सबै बालबालिकालाई टाइफाइडविरुद्ध खोप लगाइने बताए ।

खाेप अभियानवारे पत्रकारलाई जानकारी गराउँदै जिल्ला स्वास्थ्य कार्यालयका खाेप अधिकृत ईश्वरी पाैडेल ।

‘खोप अभियान १५ दिनसम्म चल्नेछ’, खाेप अधिकृत पौडेलले भने, ‘यो अभियानपछि पनि नियमित खोप कार्यक्रम अन्तरगत सरकारले बालबालिकालाई टाइफाइडविरुद्धको खोप लगाइरहन्छ ।’

झापामा विद्यालयबाहिर ३७ हजार १५५ बालबालिका छन् । उनीहरुलाई पनि टाइफाइडविरुद्ध खोप लगाइने छ । खाेप अभियान सञ्चालन गर्न झापामा ६९० खाेप केन्द्र ताेकिएकाे छ। २२८ खाेपकर्मी र ४५६ स्वयम्सेवक परिचालन गर्ने तयारी भएको खाेप फोकल पर्सन बालकृष्ण भण्डारीले जानकारी दिए।

प्रदेश १ का १२ लाख ३८ हजार ३ सय ८७ बालबालिकालाई खोप लगाउने लक्ष्य रहेको प्रदेश स्वास्थ्य निर्देशनालयका निर्देशक ज्ञानबहादुर बस्नेतले बताए ।

प्रदेशमा सबभन्दा बढी मोरङमा ३ लाख ४७ हजार २२५ र सबभन्दा कम तेह्रथुममा २५ हजार ७१७ बालबालिका छन् । टाइफाइड संक्रमण र यसबाट हुने जटिलतालाई न्यूनीकरण गर्न स्वास्थ्य सेवा विभागले देशव्यापी खोप अभियान सञ्चालन गर्न लागेको हो ।

सामान्यतया दूषित खाना वा पानीबाट सर्ने टाइफाइड ज्वरो ‘साल्मोनेला टाइफी’ भनेर चिनिने ब्याक्टेरियाले गर्दा हुने संक्रमण हो ।

टाइफाइडको संक्रमण भए लामो समयसम्म चर्को ज्वरो आउने, थकाइ लाग्ने, टाउको र पेट दुख्ने, वाकवाकी वा पखाला लाग्ने हुन्छ । यो खोप अभियानसँगै टाइफाइड खोपको सुरुवात गर्ने नेपाल दक्षिण एसियामै पहिलो राष्ट्र हुनेछ ।

नेपालमा हाल दिन लागिएको खोप टाइफाइड कन्ज्युगेट भ्याक्सिन हो । विश्व स्वास्थ्य संगठनले सिफारिस गरेको यो खोप विश्वका धेरै देशमा प्रयोग भइरहेको छ ।

विभागका अनुसार नेपालमा टाइफाइड रोगको संक्रमण र जोखिमको दर उच्च छ । बर्सेनि ४ लाख ५० हजार भन्दाबढी टाइफाइडबाट संक्रमित हुने गरेका छन् ।

अभियान अन्तरगत देशभरका ७४ लाख १५ हजार १ सय ६३ जना बालबालिकालाई खोप लगाउने तयारी भएको हो । संस्थागत वा सामुदायिक विद्यालयलाई खोप केन्द्र निर्धारण गरी अभियान सञ्चालन गरिनेछ । विद्यालय नभएका वा कम भएका वडामा बाह्य खोप केन्द्र हुनेछन् ।

अभियानको अन्तिम दिन भने खोप सेवा सञ्चालन गर्ने सबै स्वास्थ्य संस्थामा टाइफाइडविरुद्धको खोप दिइनेछ । खोप अभियानमा देशव्यापी रुपमा १० हजार स्वास्थ्यकर्मी र १ लाख १२ हजार ८ सय ५८ स्वयम्सेवक परिचालन गर्ने तयारी छ ।

स्वास्थ्य तथा जनसङ्ख्या मन्त्रालयकी प्रवक्ता डा. संगिता कौशल मिश्राले यसपटक ९५ प्रतिशत बालबालिकालाई टाइफाइडविरुद्धको खोप लगाउने लक्ष्य लिएको बताएकी छन् ।

You may also like...

Leave a Reply

Your email address will not be published. Required fields are marked *