- प्रहरीसँगको भिडन्तमा २९ जना माओवादीको मृत्यु
- डाक्टर सन्दुक रुइतलाई पाँच लाख रूपैयाँ राशिको पुरस्कार
- पत्रकार ढकाल पुरस्कृत
- कालिका सामुदायिक वन परिसरमा हात्ती मृत फेला
- विद्युतीय तारबार व्यवस्थापनको कामबाट बाहिरियो राष्ट्रिय प्रकृति संरक्षण कोष
बिर्तामोड – झापाली गायक अर्जुन खरेलको म्युजिक भिडियो ‘चमेली’ सार्वजनिक भएको छ । झापाको बिर्तामोडस्थित शिक्षा बहुउद्देश्यीय सहकारी संस्थाको सभाहलमा आज आयोजित कार्यक्रमका बीच म्युजिक भिडियो सार्वजनिक भएको हो।
साहित्य चौतारीका अध्यक्ष हस्त परियार, क्षितिज नाट्य समूहका अध्यक्ष माधव कल्पित, डाइनामिक ग्रुप नेपालकी अध्यक्ष खगिन्द्रा खुसी लगायतले भिडियो सार्वजनिक गरेका हुन् ।
कार्यक्रममा प्रमुख अतिथि परियारले खरेलको गीत चमेलीले चमेली फूलझैं देश विदेशमा चर्चित भएर सफलता प्राप्त गर्ने विश्वास व्यक्त गरेका छन्। त्यस्तै, विशिष्ट अतिथि रङ्गकर्मी कल्पितले यो गीतले बालकदेखि बृद्धसम्म सबैको मन जित्ने बताए।
कार्यक्रममा गीतको समीक्षा साहित्यकार विवश बलिभद्र कोइरालाले गरेका थिए। उनले गायक खरेलले १७ वटा भन्दा बढी गीतमा स्वर दिएको बताए ।
रमेश दर्नालको शब्द रहेको गीतको छायाङ्कन इलामको दानाबारी लगायतका स्थानमा गरिएको छ । भद्रपुर–१०, चन्द्रगढी निवासी ४३ वर्षीय खरेलको यो पाँचौँ म्युजिक भिडियो हो ।
गायक खरेल २०६० सालदेखि गायन क्षेत्रमा क्रियाशील छन् भने दर्जनौं स्टेज कार्यक्रममा प्रस्तुति दिइसकेका छन् । कार्यक्रममा गायक खरेलले चमेलीलाई दर्शक तथा स्रोताले यसअघिका गीतझैं माया गर्ने विश्वास व्यक्त गरेका छन् ।
ग्रुपकी अध्यक्ष खगिन्द्रा खुसीको अध्यक्षतामा भएको कार्यक्रममा ग्रुपका सल्लाहकार एवम् साहित्यकार देवीचरण भण्डारी, गीत एरेन्जर रोहित लिम्बू, पिज्जा घरका सञ्चालक याम खरेल, साहित्यकार तथा कलाकारहरु टीका भट्टराई, सुजना खतिवडा, मुना प्रसाईं, सुनिता तामाङ लगायतको उपस्थिति रहेको थियो ।
ग्रुपका कोषाध्यक्ष चन्द्रमणि पौडेलले सञ्चालन गरेको कार्यक्रममा स्वागत उपाध्यक्ष गीता सुवेदी नेपालले गरेकी थिइन्।
