चिया निकासीमा देखिएको भारतीय अवरोध हट्यो

• स्पीक कर्नरका सम्पादक न्यौपाने सम्मानित
• राष्ट्रिय टीममा फिर्ता आए सन्दीप
• मेची प्रादेशिक अस्पतालमा मन्त्रीको छड्के
• प्रथम अध्यक्षलाई अभिनन्दन गर्दै प्रेस चौतारी झापा
• बिर्तामोड नगरपालिकाद्वारा विपन्न जेष्ठ नागरिकलाई न्यानो कपडा वितरण

झापा– पूर्वीनाका काँकडभिट्टाबाट एक सातादेखि रोकिएको नेपाली चियाको भारत निकासी सुचारु भएको छ । भारतका दुई निकायबीच चियाको सर्टिफिकेट कसले जारी गर्ने भन्ने विषयमा विवाद हुँदा त्यसको असर नेपाली चिया निर्यातमा परेको थियो ।

टी काउन्सिल अफ इण्डिया र भारतीय टी बोर्ड बीचको विवादका कारण नेपाली चिया लोड भएका ट्रक काँकडभिट्टा नाकामा रोकिएका थिए । भारतीय दुई निकायबीच सहमति भएपछि नेपाली चियाको निर्यातमा भइरहेको अवरोध हटेको मेची भन्सार कार्यालय काँकडभिट्टाले जनाएको छ ।

टी काउन्सिल अफ इण्डियाले जारी गरेको सर्टिफिकेटका आधारमा नेपाली चियाको निर्यात सुचारु भएको मेची भन्सार कार्यालयका प्रमुख केशवराज ओलीले बताए । नेपाली चिया व्यवसायीले भने भारतीय टी बोर्डले नेपाली चियाको गुणस्तरमाथि प्रश्न उठाउँदै निर्यातमा अवरोध गरेको जनाएका छन् ।

तर, सरकारी अधिकारी भने भारतले नेपाली चियाको गुणस्तरमा प्रश्न नउठाएको दावी गर्छन् । केही वर्षदेखि भारतले बेला–बेलामा नेपाली चिया निर्यातमा अवरोध गर्दै आएको छ । भारतीय अवरोध हुँदा नेपाली चियाको निर्यात घटेको मेची भन्सार कार्यालयको तथ्याङ्क छ ।