२२ माघ २०७९, आइतबार | Sun Feb 5 2023

सभामुखलाई ओलीको चेतावनी : किन न्यायाधीस पल्टिन खोजेको ?



झापा– नेकपा एमालेका अध्यक्ष केपी शर्मा ओलीले सभामुख अग्नि सापकोटाको भूमिकामाथि गम्भिर प्रश्न उठाएका छन् । न्युज एजेन्सी नेपाललाई दिएको अन्तरवार्तामा पूर्व प्रधानमन्त्री समेत रहेका अध्यक्ष ओलीले सभामुख सापकोटाले आफैं माओवादी कार्यकर्ताजस्तो बनेर र न्यायाधीशजस्तो बनेर निष्पक्ष भूमिका निर्वाह गर्न नसकेको बताए ।

अध्यक्ष ओलीको धारणा जस्ताको तस्तै
सभामुखको काम पार्टीले कसैलाई निष्कासन गर्छ भने नोटिस जारी गर्दिने हो । पहिला टोपबहादुर रायमाझी, लेखराज भट्ट लगायतलाई पुष्पकमल दाहालले निष्कासन गर्दा तत्काल उहाँले नोटिस जारी गर्नुभएको थियो । संसदमा सुनाउनुभएको थियो । सरिता गिरीलाई प्रमुख सचेतकले उहाँलाई निकालिएको छ भन्ने बित्तिकै तत्काल सुनाउनुभएको थियो । उहाँको इन्ट्रेस्टमा ।

अहिले तीन दिनदेखि उहाँ के पर्खेर बस्नुभएको छ ? नेकपा एमालेले हटाइसकेका मान्छेहरु । एमालेले हटाएको छ भन्ने ट्रेडिसन के छ भन्दा २४ घण्टाभित्र सूचना टाँस गरिसकेको छ । यतिखेर सूचना टाँस नगर्ने ? कागजपत्र झिकाउँछु, हेर्छु । सभामुख न्यायाधीश होइन । सभामुखले छानविन गर्ने, फैसला गर्ने होइन । कुनै पार्टीले कसैलाई निकाल्छ कि निकाल्दैन, निकाल्नु उपयुक्त छ कि छैन ? न्यायाधीश होइन सभामुख ।

निष्कासन गरेको सूचना टाँसिदिने हो । सदन छ भने सदनमा सुनाउने । सदन चलेको छैन भने सूचना पाटीमा सूचना टाँस गर्नेसम्मको काम हो सभामुखको । न्यायाधीश पल्टिने हो र ? माओवादी कार्यकर्ता भएर एमालेका विरुद्ध काम गर्ने हो । एमाले फुटाउने षडयन्त्रमा सामेल हुने हो सभामुख ? उहाँ केलाई पर्खिरहनुभएको छ ? उहाँले ठान्नुभएको होला उहाँले नसुनाएसम्म पद कायमै रहन्छ । र, त्यो कायमै रहेको पदसँग उहाँहरुले एमाले विरोधी मान्छे त्यहाँ संसदमा उपस्थित गराउने भन्ने ।

अग्नि सापकोटाजीलाई म सोध्न चाहान्छु– ‘संसद चलाउनु छ कि छैन ? गैरकानुनी ढंगले, मनमौजी ढंगले संसद चल्न सक्दैन । उहाँलाई सभामुख हुनु छकि छैन ? एउटा पार्टी कार्यकर्ताको भूमिकामा रहेर सभामुख हुन सकिँदैन । सभामुखको कुर्सीमा बसेपछि निष्पक्ष भूमिका निर्वाह गर्नसक्नुपर्छ ।

होइन भने उहाँले छोडिदिए हुन्छ । त्यो निष्पक्षता अपनाउन सकिँदैन भने सभामुख छोडिदिए हुन्छ । निष्पक्ष मन छैन भने । पार्टीप्रतिको लोयल्टी नै कायम राख्नुहुन्छ भने । त्यसअनुसारकै आचरण र व्यवहार गर्नुहुन्छ भने । कार्यकर्ता भैरहनुहुन्छ भने सभामुख हुन सकिदैन । त्यसकारण उहाँले रोज्नुपर्छ ।

या त कार्यकर्तामा फर्किनुपर्छ या सभामुखको हैसियतमा निष्पक्ष ढंगले काम गर्नुपर्छ । यो अटेरी, जिद्दी, गैरकानुनी तालले असंसदीय क्रियाकलाप रिपिटेट्ली देखाउनुभएको छ । माओवादी कार्यकर्ताको रुपमा काम गर्नुभएको छ । त्यो काम गर्न पाइँदैन ।

प्रकाशित मिति : ३ भाद्र २०७८, बिहिबार ००:००  ८ : ५४ बजे